Արամ Ա կաթողիկոսն այցելել է Ֆիլադելֆիա

Շարունակելով ԱՄՆ-ի Արևելյան թեմի հովվապետական այցելությունը՝ Ն.Ս.Օ.Տ.Տ. Արամ Ա Վեհափառ Հայրապետն այցելել է Ֆիլադելֆիա: Այս մասին տեղեկանում ենք Կիլիկիո կաթողիկոսության պաշտոնական կայքից:

Նորին Սրբությանը դիմավորել են Ֆիլադելֆիայի Ս. Գրիգոր Լուսավորիչ եկեղեցու հոգևոր հովիվ Տ. Ներսես. Ավ. Մանուկյանը և հոգաբարձության անդամները: Վեհափառին ուղեկցել են ԱՄՆ Արևելյան թեմի առաջնորդ Գերշ. Տ. Օշական Արք. Չոլոյանը, առաջնորդական փոխանորդ Գերշ. Տ. Անուշավան Եպս. Դանիելյանը, կաթողիկոսարանի միջեկեղեցական բաժանմունքի վարիչ Գերպ. Տ. Հուսիկ Ծ. Վրդ. Մարտիրոսյանը, Հոգշ. Տ. Պետրոս Աբղ. Մանվելյանը և ազգային կենտրոնական վարչության անդամ Տրտատ Մանկիկյանը:

Սրբազան առաջնորդը Ֆիլադելֆիայի մեր ժողովրդի զավակներին փոխանցել է իր պատգամը, ողջունել նրանց և բարձր գնահատել եկեղեցական դասի, ազգային վարչության ու առաջնորդարանի բոլոր մարմինների գործունեությունը: Նա շեշտել է մեր արմատներին, արժեքներին, ինքնությանն ու նահատակների կտակին հավատարիմ ու կառչած մնալու կարևորությունը: Անդրադառնալով Հայոց ցեղասպանության 100-րդ տարելիցին՝ Նորին Սրբությունը նշել է. «Մեզ համար ամեն օր ապրիլի 24 է, մեզ համար ամեն տարի 100-ամյակ է այնքան ժամանակ, քանի դեռ մեր ժողովրդի արդար իրավունքները մնում են ոտնահարված ցեղասպանի կողմից»:

Մայիսի 13-ի առավոտյան Ֆիլադելֆիայի Ս. Գրիգոր Լուսավորիչ եկեղեցու հոգևոր հովվի ու հոգաբարձության կազմակերպությամբ տեղի է ունեցել հանդիպում Վեհափառ Հայրապետի և Ֆելադելֆիայի հայ եկեղեցականների և կազմակերպությունների ներկայացուցիչների միջև: Հանդիպումից հետո Վեհափառ Հայրապետը մեկնել է Նյու Ջերսի: