Կառավարությունը լրացուցիչ 10 մլրդ դրամ կհատկացնի գյուղացիներին սուբսիդավորմամբ վարկավորելու համար

Հայաստանի կառավարությունը պետական բյուջեից լրացուցիչ 10 մլրդ դրամ կհատկացնի Կենտրոնական բանկին՝ գյուղացիական տնտեսություններին մատչելի՝ 8 տոկոսով դրամային վարկ տրամադրելու նպատակով: Այդ մասին ՀՀ կառավարության նիստում հայտարարեց Վարչապետ Հովիկ Աբրահամյանը: «Հայաստանի գյուղատնտեսության նախարարությունը և Կենտրոնական բանկը քննարկել են գյուղացիական տնտեսություններին տրամադրվող վարկերի խնդիրը: Հայտնի է, որ վարկերը տրամադրում էին 14 տոկոսով, որից վեց տոկոսը սուբսիդավորում է կառավարությունը: Այժմ Կենտրոնական բանկը ռեսուրսների պակաս ունի և Հանրապետության նախագահի հետ քննարկել ենք խնդիրը, որոշում ենք կայացրել պետբյուջեից 10 մլրդ դրամ հատկացնել ԿԲ-ին, որն այն կփոխանցի «Ակբա Կրեդիտ Ագրիկոլ» բանկին և այլ բանկերի՝ վարկային միջոցները գյուղացիներին հատկացնելու համար»,- «Արմենպրես»-ի հաղորդմամբ՝ ասաց ՀՀ վարչապետը:

Հովիկ Աբրահամյանը նշեց, որ գյուղացիներին տրմադարվելիք վարկը կառավարության սուբսիդավորմամբ կտրամադրվի 8 տոկոսով: Ի դեպ, վարկը կհատկացվի ՀՀ դրամով: