Հայաստանը բանակցում է «Հյուսիս-հարավի» կառուցման համար ևս 550 միլիոն դոլար ներգրավելու ուղղությամբ

Հայաստանը բանակցում է տնտեսական նշանակության Հյուսիս-հարավ մայրուղու կառուցման համար 550 միլիոն դոլար ներգրավելու համար: Այս մասին հայտարարեց ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը խորհրդարանում «Հյուսիս-հարավ ճանապարհային միջանցք» ծրագրի իրականացման ընթացքի վերաբերյալ խորհրդարանական լսումների ժամանակ: «750 միլիոն դոլար ներդրումներ արդեն արվել են, ներկայում բանակցային փուլում է ևս 550 միլիոն ԱՄՆ դոլար ներգրավելու հարցը»,- «Արմենպրես»-ի փոխանցմամբ' ասաց Արտակ Զաքարյանը' ընդգծելով, որ խորհրդարանական հանձնաժողովների կողմից նախաձեռնված լսումները նպատակ ունեն ապահովել Հայաստանի համար կարևոր ծրագրի հանրային ու խորհրդարանական վերահսկողությունը:

Արտակ Զաքարյանի տեղեկացմամբ' Հայաստանի հյուսիսը հարավին կապող մայրուղու կառուցման համար 500 միլիոն դոլար է տրամադրել Ասիական զագացման բանկը, 60 միլիոն եվրո' Եվրոպական ներդրումային բանկը, 150 միլիոն դոլար' Եվրասիական զարգացման բանկի հակաճգնաժամային հիմնադրամը, իսկ մնացածը դրամաշնորհներ են:

Խորհրդարանական լսումներին ներկա էր Հայաստանում Ասիական զարգացման բանկի ներկայացուցիչը Դեյվիդ Դոլը, ով նշեց, որ բանկը 500 միլիոն դոլարի չափով ֆինանսական գործիք է առաջարկել ճանապարհի կառուցմանը: «Մենք շարունակում ենք աջակցել Հայաստանի կառավարությանը' երկրի մեկ սահմանը մյուսին կապող ճանապարհը ավելի զարգացնելու համար»,- ասաց Դեյվիդ Դոլը:

Լսումները նախաձեռնել են ՀՀ ԱԺ արտաքին հարաբերությունների ու ֆինանսավարկային և բյուջետային հարցերի մշտական հանձնաժողովները: Միջոցառմանը մասնակցում են ՀՀ տրանսպորտի ու կապի և էկոնոմիկայի փոխանախարարները, պատգամավորներ, հասարակական սեկտորի ներկայացուցիչներ:

«Հյուսիս-հարավ ճանապարհային միջանցքի ներդրումային ծրագիրը» խոշոր ենթակառուցվածքային ծրագիր է, որի նպատակն է միջազգային բարձր ստանդարտներին բավարարող 556 կմ ընդհանուր երկարությամբ Մեղրի-Երևան-Բավրա ավտոճանապարհի միջոցով երկրի հարավը կապել հյուսիսի հետ: Ռազմավարական կարևոր նշանակություն ունեցող այս ճանապարհի կառուցումը կապահովի Հայաստանի հարավային սահմանից դյուրին երթևեկը մինչև Վրաստանի սահման, ապա նաև դեպի Սևծովյան նավահանգիստներ, թույլ կտա իրականացնել եվրոպական չափանիշներին համապատասխանող բեռնափոխադրումներ և ուղևորափոխադրումներ, զարգացման լուրջ հնարավորություններ կընձեռի Հայաստանի հարավից հյուսիս ընկած բոլոր բնակավայրերին:

Ծրագրի իրականացման համար պայմանագրեր են կնքվել Ասիական զարգացման (ԱԶԲ) և Եվրոպական ներդրումային (ԵՆԲ) բանկերի հետ, որոնց համաձայն ծրագրի ավարտի թիրախային ժամկետներ են սահմանվել համապատասխանաբար 2017 և 2019 թվականները: Ծրագրի հաշվարկային արժեքը կազմում է մոտ 1,5 միլիարդ ԱՄՆ դոլար: Ծրագիրը բաժանված է 5 տրանշերի: Շարունակվում իրականացվել նաև բանակցային գործընթացներ միջանցքի հյուսիսային և հարավային հատվածների կառուցման նպատակով այլ դոնորների ներգրավման ուղղությամբ: