Արտեմ Ասատրյանը կարևորեց ՀՀ-ում սոցիալական ծառայությունների միասնական ընդունարանների գործարկումը

ՀՀ քաղաքացիների համապատասխան դիմումներն ընդունելու, հաշվառելու, ինչպես նաև սոցիալական ծառայություններ տրամադրող համապատասխան մարմին փոխանցելու գործընթացը դյուրացնելու նպատակով ստեղծվելու են համալիր սոցիալական ծառայությունների տարածքային կենտրոնների միասնական ընդունարաններ:

«Ներկայումս պետական չինովնիկների մեծ մասը չի ընդունում մեր քաղաքացիների դիմումները, իսկ որևէ դիմում ընդունելու դեպքում էլ հիմնականում փորձում են տալ բանավոր պատասխան, ինչն անընդունելի է: Սակայն, միասնական ընդունարանների համակարգի ներդրման դեպքում մեր քաղաքացիներին անպատճառ պետք է տրվի գրավոր պատասխան, ինչը իրենց իրավունքների իրացման երաշխիքն է, որը տարբեր պատճառներով հաճախ ոտնահարվում է»,- «Արմենպրես»-ի հաղորդմամբ' ինտեգրված սոցիալական ծառայությունների համակարգի վերաբերյալ սեմինար-քննարկմանն այսպիսի կարծիք հայտնեց ՀՀ աշխատանքի և սոցիալական հարցերի նախարար Արտեմ Ասատրյանը:

Նա նկատեց, որ ինտեգրված սոցիալական ծառայությունների համակարգի ներքո ձևավորվող համալիր սոցիալական ծառայությունների տարածքային կենտրոնների միասնական ընդունարանները ապահովելու են նաև դիմումներ ընդունողների և դիմումներ քննողների տարանջատվածությունը: «Այս համակարգի շնորհիվ քաղաքացիները հնարավորություն կստանան իրենց խնդիրները ներկայացնել հենց այն գերատեսչություն, որը հանդիսանում է տվյալ խնդրի հասցեատերը, ինչը շատ կարևոր է»,- շեշտեց Արտեմ Ասատրյանը' հավելելով, որ երկու տարվա ընթացքում Հայաստանում ստեղծվելու են 55-56 մ իասնական ընդունարաններ: «Ես համոզված եմ, որ մինչև այս տարվա վերջ մենք կտեսնենք այս համակարգի տեսանելի արդյունքները»,- ընդգծեց նախարարը:

Արտեմ Ասատրյանի դիտարկմամբ' ինտեգրված սոցիալական ծառայությունների տեղեկատվական համակարգի նպատակն է հասարակության լայն շերտերին սոցիալական ոլորտին առնչվող արդյունավետ և որակյալ տեղեկատվական աջակցության տրամադրումն և հասարակության սոցիալական իրազեկվածության մակարդակի բարձրացումը: «Վերը նշված համակարգով ներդրվում են նաև սոցիալական պաշտպանության ոլորտի մասնագիտական նյութերի էլեկտրոնային գրադարան և էլեկտրոնային համագործակցության համակարգը, ինչը կբարձրացնի հասարակության սոցիալական իրազեկվածության մակարդակը, ինչպես ն աև կնպաստի հասարակության լայն շերտերին սոցիալական ոլորտին առնչվող արդյունավետ և որակյալ տեղեկատվական աջակցության տրամադրմանը»,- նկատեց Ասատրյանը և հավելեց, որ շուտով ստեղծվելու է նոր կայք, որում կլինի բարձրախոս' տեսողության խնդիր ունեցող անձանց համար, և բարձրախոսի միջոցով նրանք հնարավորություն կունենան ծանոթանալ կայքի բովանդակությանը:

ՀՀ կառավարությունը համալիր սոցիալական ծառայությունների տարածքային կենտրոնների միասնական ընդունարաններ ստեղծելու որոշումը հաստատել է 2015 թվականի փետրվարի 26-ին: