ԱՄՆ գործողությունները սպառնում են Մերկելի քաղաքական կարիերային. Frankfurter Rundschau

Գերմանական Frankfurter Rundschau թերթը հոդված է հրապարակել, որում ասվում է, որ Անգելա Մերկելի քաղաքական գոյությունը պայմանավորված է նրա իմիջով՝ հիմնված օբյեկտիվության և անկեղծության վրա: Սակայն այժմ նա կարող է կորցնել հեղինակությունը Գերմանիայի և ԱՄՆ-ի միջև լրտեսական սկանդալի պատճառով:

«ԱՄՆ-ի հետաքրքրասիրությունը ճեղք է թողել ճակատում, և այդ ճեղքը սովորական քերծվածքից շատ ավելին է: Այն ընդլայնվում է»,- գրում է հոդվածի հեղինակ Դանիելա Վատեսը:

Խոսքը վերջերս Süddeutsche Zeitung պարբերականի, WDR և ND հեռուստաալիքների լրագրողների կատարած հետաքննության մասին է, որի ընթացքում պարզվել է, որ 2013թ. ԱՄՆ կառավարությունը Գերմանիայի հետ, այսպես կոչված, հակալրտեսական համաձայնագրի կնքմանը հստակորեն չի համաձայնել՝ չնայած Մերկելի խորհրդականն այն ժամանակ հակառակն էր պնդում:

Այդ տեղեկատվության հրապարակումից հետո գերմանական մի շարք ԶԼՄ-ներ քննադատել են Մերկելին:

Ըստ Վատեսի՝ Մերկելը կամ խաբել է, կամ ծածկել իր մտերիմ համախոհների սուտը:

«Դրանք լուրջ մեղադրանքներ են, և դաշնային կանցլերի դեպքում դրանց ծանրությունը կրկնապատկվում է»,- նշում է հոդվածագիրը: Նա գրում է, որ խոսքը քաղաքական որոշումների մասին չէ, որոնք կարող են «ճիշտ կամ ոչ ճիշտ» լինել, այլ ազնվության մասին:

Այժմ Մերկելն ու նրա մամլո քարտուղարը պնդում են, որ «լավագույն մղումներով» են գործել:

Մերկելին քննադատել է ոչ միայն Frankfurter Rundschau պարբերականը: Մասնավորապես, Rheinische Post թերթի թղթակիցը գրել է, որ Մերկելի գործողությունները լրտեսական սկանդալի ֆոնին կարելի է որակել որպես իր ժողովրդին տված երդման խախտում: Իր հերթին, Spiegel ամսագրի թղթակիցը նշել է, որ Մերկելը, լինելով աշխարհի ոչ միայն ամենահզոր, այլև ամենաքիչ միամիտ կանանցից մեկը, չէր կարող չիմանալ իր օգնականի հայտարարությունների մասին և, հետևապես, միտումնավոր ստել է: