Արտահանման և ներմուծման անկումը արտացոլում է նախորդ տարվա տնտեսական ցնցումները

Փորձագետները Հայաստանի արտաքին առևտրաշրջանառության և ներքին սպառման անկումը պայմանավորում են տնտեսական մի քանի գործոններով՝ կապելով դրանք ռուսական շուկայի վատթարացման հետ: Երբ նախորդ տարի ռուսական ռուբլին կտրուկ արժեզրկում գրանցեց դոլարի նկատմամբ, իսկ արևմտյան պատժամիջոցները խոչընդոտներ ստեղծեցին ռուս տնտեսավարողների համար, ՌԴ տնտեսության վիճակը վատթարացավ: Արդյունքում խնդիրներ առաջացան նաև հայ գործարարների համար, ովքեր իրենց արտադրանքի իրացումը կազմակերպում էին ռուսական շուկաներում:

Մյուս կողմից՝ ՌԴ տնտեսության անկումը զգալի էր Հայաստանի այն բնակիչների համար, ովքեր դրամական փոխանցումներ էին ստանում այդ երկրից, քանի որ դրամային արտահայտությամբ տրանսֆերտների ծավալը կրճատվեց շուրջ 2 անգամ: Ներկայումս այս իրադարձություններն արտացոլվում են Հայաստանի տնտեսական ցուցանիշներում:

«Արմենպրես»-ի հետ զրույցում տնտեսագետ Վազգեն Սաֆարյանը կարծիք հայտնեց, որ գործարարները ներկայումս սպասողական վիճակում են և չեն շտապում ավելացնել արտահանումը դեպի ռուսական շուկա, ինչն էլ չի վրիպում վիճակագիրների աչքից: «Սա քիչ աղերս ունի սեզոնայնության հետ և ավելի շուտ պայմանավորված է նրանով, որ գործարարները սպասում են մինչև ռուսական շուկան կայունանա, որպեսզի արտահանումները վերսկսեն: Իսկ այն, որ տեղական շուկայում ևս կրճատվել է առևտրի ծավալը, տնտեսագետի կարծիքով, գնողունակության անկման հետևանք է: Հայաստան եկող տրանսֆերտների կրճատումը ազդել է նաև մարդկանց վճարունակության և եկամուտների վրա»,- ասաց Սաֆարյանը: Փորձագետը, սակայն, վստահություն հայտնեց, որ արդեն անցել է վտանգավոր ժամանակահատվածը, որովհետև ռուբլին կայունանում է, իսկ ՌԴ տնտեսությունը ակտիվացման նշաններ է ցույց տալիս:

ՀՀ արտաքին առևտրաշրջանառության անկման վերաբերյալ այլ կարծիք ունի տնտեսագետ Վարդան Բոստանջյանը: Նրա խոսքով' հայաստանյան տնտեսությունն այս պահին «հենված է» գյուղատնտեսության ճյուղի վրա, իսկ գյուղարտադրությունն ու գյուղմթերքի վերամշակումն այս պահին պասիվ վիճակում են: «Գուղատնտեսության ճյուղը կարծես թե երանգ է հաղորդում տնտեսական ակտիվության ցուցանիշին, քանի որ տնտեսության մյուս ճյուղերը ստատիկ վիճակում են: Սական դա խաբուսիկ տպավորություն է, ինչի մասին են վկայում տնտեսական ցուցանիշները: Այն, որ ներմուծումը շ ուրջ 35 տոկոս անկում է գրանցել, նրանից է, որ երկրում նվազել է վճարունակ պահանջարկը: Քանի որ բնակիչների եկամուտները ցածր են, բնականաբար, սպառման մակարդակը ևս իջնում է»,- նշեց փորձագետը:

Հայաստանի տնտեսական ակտիվության ցուցանիշը 2015 թվականի հունվար-ապրիլ ամիսներին 2.7 տոկոսով գերազանցել է նախորդ տարվա նույն ժամանակահատվածի ցուցանիշը: Անկում են գրանցել առևտրի շրջանառության, էլեկտրաէներգիայի արտադրության, արտաքին առևտրաշրջանառության ոլորտները, արտահանման ու ներմուծման ծավալները: Առևտրի շրջանառությունը նվազել է 7.6 տոկոսով: 2014թ. հունվար-ապրիլի համեմատ արտաքին ապրանքաշրջանառության ծավալները ընթացիկ տարվա առաջին չորս ամսում նվազել են 31.4 տոկոսով, այդ թվում' արտահանումը կրճատվել է 18.8 տոկոսով, իսկ ներմուծումը' 35.7 տոկոսով: