Հալեպահայերը ապրիլ-մայիս ամիսներին մեծ վտանգների միջով են անցել

Սիրիահայության շտապ օգնության և վերականգնման մարմինը հաղորդագրություն է հրապարակել հալեպահայերի վիճակի մասին:

«Գանձասար» թերթի հաղորդագրության մեջ մասնավորապես նշված է. «Հալեպահայության համար 2015թ. ապրիլ և մայիս ամիսները ապահովության առումով չափազանց ծանր էին: Այս պայմաններում մեր ժողովրդի զավակներից ոմանք ժամանակավոր, ոմանք հիմնական տեղափոխվել են Հալեպից: Այդուհանդերձ, պատկառելի թվով հալեպահայեր դիմագրավել են դժվարությունները և դեռ շարունակում են մնալ Հալեպում' ջանք չխնայելով իրենց ընտանիքների և հալեպահայ համայնքի պահպանմանը նպաստելու գործի համար:

Հալեպում կամավոր մնացող հայությունն այսօր ամենաշատը կարիք ունի զգալու, որ արտասահմանցի իր ազգակիցները նեցուկ կկանգնեն իրեն և միայնակ չեն թողնի այս վիճակում: Հալեպահայը կարիք ունի զգալու, որ քար առ քար վերակառուցող ընտանեկան, հոգևոր թե կրթական օջախի համար իր ձեռքերի հետ այլ հարազատ ձեռքեր ևս կան:

Մեր պարտականությունն է ամեն կերպ տեր կանգնել մեր ժողովրդին, և այս առաքելությունը պահանջում է Հալեպում մնացող հայությանն առօրյա կյանքի բարելավմանը նպաստող նախաձեռնություններում օժանդակություն կատարել: Հալեպում մնալ ցանկացող հայ ընտանիքները կարիք ունեն նյութական օժանդակության, և հալեպահայերին պետք է վերապահել օժանդակության նախապատվությունը:

Որևէ հալեպահայի համար հեշտ չէ դարերի խորություն ունեցող, հոգևոր ու նյութական մշակույթ, պատմական արժեք ներկայացնող, հայ մարդու կերտման ու մարդուժի պատրաստման դարբնոց հանդիսացող և հայ իրականության մեջ իր անհերքելի նպաստն ունեցող հալեպահայ համայնքի գոյությունն անցյալ համարել:

Ուստի հարկավոր է ըմբռնել ու հարգել Հալեպում մնացողների պայմաններն ու մոտեցումը և հալեպահայի այս ճակատագրական պահին շարունակել անմիջական օգնության ձեռք մեկնել:

Հալեպահայի կոչը, վստահաբար, անարձագանք չի մնա»: