Ռուսաստանի արդարադատությունն ընդդեմ երեք հանցագործների սպանած Գեղամ Սարգսյանի

Տուլայի մարզում շարունակվում է հետաքննությունը Գեղամ Սարգսյանի բնակարանի վրա հարձակման գործով, որի ժամանակ 52-ամյա տղամարդն իր ընտանիքին պաշտպանելու նպատակով սպանել էր երեք հանցագործներին, իսկ չորրորդին վիրավորելով՝ ստիպել փախուստի դիմել։ Հետաքննությունը չի բացառում, որ երեք հանցագործի սպանած և չորրորդին վիրավորած Սարգսյանը, գերազանցել է ինքնապաշտպանության թույլատրելի սահմանները, հաղորդում է NEWSru.com-ը։ Թեև նրա բոլոր փաստաբանները միաձայն պնդում են, որ իրենց պաշտպանյալը պետք է արդարացվի, շատ հավանական է, որ նրա դեմ կարող են գործել ռուսական օրենքները, իսկ այդ դեպքում նրա անմեղությունն ապացուցելը շատ դժվար կլինի։

Ինչպես հաղորդում է Life News–ը, հայտնի է դարձել, որ երեքշաբթի ձերբակալվել է չորրորդ հանցագործը, որը, ըստ Սարգսյանների ընտանիքի, ատրճանակն ուղղել էր յոթ ամսեկան երեխայի կողմը՝ սպառնալով սպանել նրան։ Ընտանիքի անդամները հայտնել են, որ Գեղամ Սարգսյանը հանցագործներին դանակահարել է այն բանից հետո, երբ վերջիններս սպառնացել են սպանել ընտանիքի ամենափոքր անդամին։ Սակայն ոստիկանությունը հերքել է չորրորդ հանցագործին ձերբակալելու մասին տեղեկությունը։ 

Ըստ ՌԴ քրեական օրենսգրքի 105 հոդվածի 2–րդ մասի (երկու կամ ավելի անձանց սպանություն)՝ Գեղամ Սարգսյանին ցմահ բանտարկություն է սպառնում, թեև, իրավաբանների կարծիքով, այն կարող է փոխարինվել քրեական օրենսգրքի 108 հոդվածով (ինքնապաշտպանության նպատակով մի քանի անձի մահացու մարմնական վնասվածք հասցնել), համաձայն որի, դատարանը Սարգսյանին կարող է առավելագույնը երկու տարվա ազատազրկման դատապարտել։