Եգիպտական «Ալ Ահրամ»-ն անդրադարձել է Հայոց ցեղասպանությանը

Եգիպտական հեղինակավոր «Ալ Ահրամ» օրաթերթում լույս է տեսել եգիպտացի ճանաչված հրապարակախոս, միջազգային իրավունքի մասնագետ Այման Սալամայի արաբերեն հոդվածը՝ Հայոց ցեղասպանության մասին։

«Ցեղասպանությունը՝ միջազգային հանցագործությունների հանցագործություն» հոդվածում հեղինակը հաստատում է, որ 1915թ. օսմանյան իշխանությունների կողմից հայերի դեմ իրականացված ոճիրը ցեղասպանություն է՝ համաձայն 1948 թ. դեկտեմբերի 9-ին ՄԱԿ-ի ընդունած «Ցեղասպանության հանցագործության կանխման և դրա համար պատժի մասին» կոնվենցիայի դրույթների։

«Ցեղասպանությունը ցնցել է մարդկային խիղճը, գլոբալ համակարգը, մարդկային արժանապատվությունն ամբողջությամբ։ Այդ սարսափելի հանցանքը, դրա եղկելի գործերը պատմության մատյանում գրանցված են սևով։ Այն ոչ միայն ոտնահարում է միջազգային իրավունքը, այլև երկնային բոլոր կրոնները: Դա մարդկային ամբողջ հանրության գոյության իրավունքի մերժումն է»,- «Արմենպրես»-ի փոխանցմամբ՝ ընդգծում է հոդվածագիրը։

Այման Սալաման, ով մասնակցել է ապրիլի 22-ից 23-ը Երևանում կայացած «Ընդդեմ ցեղասպանության հանցագործության» գլոբալ ֆորումին, մանրամասն կերպով հիմնավորում է 1915թ. Հայոց ցեղասպանությունը ճանաչելու անհրաժեշտությունը։ Ըստ նրա՝ Թուրքիայի ժխտողականությունն անհամատեղելի է բարոյական, մարդկային և իրավական արժեքների հետ և Հայաստանի և Թուրքիայի միջև պաշտոնական և ոչ պաշտոնական հարաբերությունները նորմալացնելու գլխավոր խոչընդոտն է։

Քննադատելով Անկարայի կեցվածքը՝ Սալաման գրում է. «Ներկայիս թուրքական կառավարությունը պնդում է, որ 1915թ. հայերից զոհ է գնացել ընդամենը 300 հազար մարդ, որոնք, իբր, մահացել են սոսկ եղանակային վատ պայմանների, սովի և ծարավի պատճառով, թե իբր նրանց ուղեկցող թուրք զինվորները մի փամփուշտ անգամ չեն արձակել' հայերին սպանելու համար»։

Հեղինակը եզրափակում է, որ անցյալում մարդու իրավունքների ոտնահարումների մասին ճշմարտության իմացությունը հասարակություններին ուժ է տալիս կանխարգելելու նմանատիպ իրադարձությունների կրկնությունը, ինչպես նաև օգնում է հաշտեցմանը։ Իրազեկված լինելը հիմնարար անհրաժեշտություն է պառակտումների և բաժանարար գծերի վերացման համար։