ՀՀ-ում ավելի մրցունակ հատվածի ձևավորման համար ԱՄՆ-ը կհատկացնի լրացուցիչ 6,683 մլն դոլար

Տնտեսություն 4 Հունիս, 2015 16:37

Ավելի մրցունակ և զանազանեցված մասնավոր հատվածի ձևավորման նպատակով ԱՄՆ-ի կառավարությունը կշարունակի ԱՄՆ Միջազգային զարգացման գործակալության միջոցով ՀՀ կառավարությանն օժանդակության ծրագիրը: Դեռևս 2010 թվականին երկու երկրների միջև այդ նպատակով ստորագրվել էր համապատասխան համաձայնագիր, որի շրջանակում արդեն իսկ մեր երկրին ցուցաբերվել է ավելի քան 40 մլն դոլարի օժանդակություն:

«Արմենպրես»-ի հաղորդմամբ՝ ՀՀ կառավարությունը հավանություն տվեց ԱՄՆ ԶՀԳ-ի կողմից ստացված Համաձայնագրի Փոփոխություն թիվ 6-ի նախագծին, որը նախատեսում է լրացուցիչ 6 մլն 683 հազար դոլարի ֆինանսական հատկացումների իրականացում, ինչի դեպքում հատկացումների ընդհանուր գումարը կկազմի 51մլն 41 հազար 565 դոլար:

ՀՀ էկոնոմիկայի նախարար Կարեն Ճշմարիտյանը նշեց, որ դրամաշնորհ ստացողը պետք է մշակի քաղաքացիական ավիացիայի նոր օրինագիծ, սահմանի վերջինին առնչվող ընթացակարգերը, իրականացնի փոփոխություններ բնապահպանական և բնօգտագործման վճարների մասին օրենքում' Արարատի և Արմավիրի մարզերի ձկնաբուծարաններում օգտագործվող ստորգետնյա ջրի համար ջրօգտագործման վճարը սահմանելով ծավալի 100%-ի չափով, ինչպես նաև ապահովի ջրի որակի և ջրօգտագործման թույլտվությունների տվյալների հասանելիությունը հանրությանը:

ՀՀ էկոնոմիկայի նախարարությունը նպատակահարմար է համարում վերոնշյալ Համաձայնագրի ստորագրումը ՀՀ-ի կողմից: