Արտահայտել դժգոհություն, ստանալ բացատրություն

«Հայաստանի էլեկտրական ցանցեր» ընկերությունը դիմել է «Հանրային ծառայությունները կարգավորող հանձնաժողովին»՝ հոսանքի սակագնի վերանայման հայտով: Ընկերությունն առաջարկում է բնակչության համար էլեկտրաէներգիայի մեկ կիլովատտ/ժամի սակագինը բարձրացնել 17 դրամով: Եթե հանձնաժողովը համաձայնի՝ սպառած էլեկտրաէներգիայի ցերեկային սակագինը ներկայիս 41 դրամ 85 լումայի փոխարեն կդառնա 58 դրամ 93 լումա, իսկ գիշերային սակագինը՝ 48 դրամ 93 լումա՝ ներկայիս 31.85 դրամի դիմաց:

ԼՈՒՐԵՐ.com-ը զրուցեց տնտեսագետ Վահագն Խաչատրյանի հետ՝ ճշտելու՝ արդյոք հասարակության բարձրացրած բողոքի ալիքը կկարողանա՞ ճնշել իշխանություններին՝ չթանկացնել էլեկտրաէներգիան:

«Պետք է խնդիրը դնել ոչ թե կարողանալու կամ չկարողանալու վրա, այլ հասարակությունն ու քաղաքացիները պետք է ավելի շատ օգտվեն իրենց սահմանադրական իրավունքից:

Քաղաքացիները պետք է իրենց դժգոհությունն արտահայտեն: Դժգոհելը, եթե արտահայտվում է առանձին կամ տնային խոսակցությունների և կամ խմբակային հավաքույթների ժամանակ, սահմանափակվում է մամուլի քննարկումներով, որևէ արձագանքի չի արժանանում պատասխանատուների կողմից:

Այս դեպքում քաղաքացիները պետք է օգտվեն սահմանադրական իրենց իրավունքից՝ բողոքի միջոցառումները պետք է լինեն, որտեղ պետք է հստակ ձևակերպեն իրենց դժգոհության պատճառը:

Ես համոզված եմ, որ եթե հասարակությունն այս տրամաբանությամբ շարժվի, ի վերջո ինքն է հաղթելու:

Ի վերջո, երկիրը և Սահմանադրությունը ժողովրդինն են, դա առանձին մարդկանցը չէ, դա ՀԷՑ-ինը չէ, պետական մի քանի պաշտոնյաներինը չէ, դա Հայաստանի Հանրապետության քաղաքացիներինն է:

Ու այս տեսանկյունից ելնելով՝ հանրային դժգոհության ալին իր ազդեզությունը կունենա»,- ասաց Խաչատրյանը:

Տնտեսագետի կարծիքով՝ եթե չլինի դժգոհություն, պաշտոնյաները կարձանագրեն, որ որևիցե դժգոհություն չկա, ուրեմն նշանակում է՝ հասարակության համար այդպիսի խնդիր չկա, և դա արհեստական ձևակերպված խնդիր էր, համարժեք եզրակացություններ կանեն, որոշումներ կընդունեն՝ ի վնաս ժողովրդի:

«Պետք է քաղաքացին օգտվի սահմանադրական իր իրավունքից, որը, տվյալ դեպքում, հետևյալն է. արտահայտել դժգոհություն, ստանալ բացատրություն, թե ինչու են ուզում թանկացնել»,- ասաց Խաչատրյանը: