Համաշխարհային բանկը կանխատեսել է Հայաստանի ՀՆԱ-ի 0.8 տոկոս աճ

Համաշխարհային բանկը կանխատեսում է, որ 2015թ. Հայաստանի տնտեսական աճը կկազմի o.8 տոկոս, իսկ հաջորդ երկու տարիներին կկարգավորվի՝ 2016թ. հասնելով 2.7 տոկոսի, իսկ 2017թ.՝ 3 տոկոսի: ՀԲ-ի հրապարակած «Գլոբալ տնտեսական հեռանկարներ» զեկույցում նշվում է, որ համաշխարհային տնտեսության աճը 2015 թվականին կվատթարանա՝ 3-ից հասնելով 2,8 տոկոսի:

Զեկույցի հեղինակները դա բացատրում են նավթի գների անկման և զարգացող տնտեսությունների համար վարկերի արժեքի բարձրացման ազդեցություններով: Վարկերի արժեքի բարձրացումը Համաշխարհային բանկը կապում է ամերիկյան դաշնային պահուստային համակարգի կողմից տոկոսադրույքների բարձրացման հետ։ «ԱՄՆ-ում տոկոսադրույքների ակնկալվող բարձրացումն առաջիկա ամիսներին կհանգեցնի ձևավորվող շուկայական տնտեսությամբ երկրների և զարգացող երկրների համար վարկերի թանկացմանը»,- բացատրվում է հաղորդագրությունում:

«Արմենպրես»-ի փոխանցմամբ՝ համաշխարհային տնտեսության անկումը վելուծաբանները կապում են նաև աշխարհաքաղաքական գործընթացների հետ: «Համաշխարհային տնտեսության աճի տեմպերի դանդաղումը նավթի գների անկման և աշխարհաքաղաքական լարվածության հետևանք է: Եվրոպայի և Կենտրոնական Ասիայի տարածաշրջանում դա պայմանավորված է նաև անուղղակի ազդեցություններով, այդ թվում, Ռուսաստանի շուրջ ստեղծված իրավիճակով»,- նշվում է զեկույցում: ՀԲ-ի վերլուծաբանների գնահատականով՝ տնտեսական աճի տեմպերը զարգացող երկրներում այս տարի կկազմեն 4,4 տոկոսի մակարդակում, 2016թ. այդ ցուցանիշը կհասնի մինչև 5,2 տոկոսի, իսկ 2017թ.՝ 5,4 տոկոսի:

Համաշխարհային բանկը նվազեցրել է նաև Հայաստանի հարևան պետությունների՝ Վրաստանի և Ադրբեջանի տնտեսական աճի ցուցանիշի կանխատեսումները: Վրաստանի համար 2015 թվականին կանխատեսվել է 2 տոկոս աճ, 2014 թվականի՝ 4.8 տոկոսի փոխարեն, իսկ Ադրբեջանում 1.5 տոկոս աճ՝ նախորդ տարվա 2.8 տոկոսի փոխարեն:

ԵԱՏՄ անդամ պետություններից Ռուսաստանի համար համար Համաշխարհային բանկը կանխատեսել է ՀՆԱ 2,7 տոկոսի անկում' 2014-ի 0.6 տոկոս աճի փոխարեն, Բելառուսի համար' 3.5 տոկոս անկում՝ նախորդ տարվա 1.6 տոկոս աճի փոխարեն, իսկ Ղազախստանում 1.7 տոկոս աճ՝ 2014թվականի 4.3 տոկոս աճի փոխարեն: