Խադիջա Իսմայիլովան The New York Times-ում հրապարակած նամակում կոչ է արել չհավատալ Ադրբեջանի ստերին

«Ազատություն» ռադիոկայանի ադրբեջանական գրասենյակի աշխատակցուհի, բանտարկված Խադիջա Իսմայիլովան բանտից նամակ է ուղարկել ամերիկյան The New York Times պարբերականին, որը հրապարակվել է ամերիկյան լրատվականի կողմից:

«Ողջ աշխարհի ուշադրություը բևեռված է իմ երկրի վրա, որն ընդունում է Եվրոպական խաղերը: Զբոսաշրջիկներն ու մարզիկները ուրախանում են բեմականացված միջոցառմամբ, իսկ միջազգային հանրությունը հետևում է դրանց հեռուստատեսությամբ: Սակայն ես չեմ նայելու այդ խաղերը, ես շատ քիչ տեղեկություն ունեմ տեղի ունեցող իրադարձությունների վերաբերյալ: Ես նստած եմ Կյուրդախանի շրջանում գտնվող բանտախցում, որն արդեն վեց ամիս է' իմ տունն է: Ես լրագրող եմ և բանտարկվել եմ Ադրբեջանի քաղաքական էլիտայի շրջանում կաշառակերության դեպքերի բացահայտման համար: Ինձ հետապն դում էին տասնյակ այլ լրագրողների, իրավապաշտպանների, երիտասարդ ակտիվիստների հետ՝ բոլոր նրանց, ովքեր ասում էին ճշմարտությունը»,- «Արմենպրես»-ի փոխանցմամբ նամակում գրել է Իսմայիլովան՝ նշելով, որ երկրի լավագույն մարդիկ հայտնվում են բանտերում: Նա ցավով է հայտնել, որ իր երկիրը մարդու իրավունքների ոլորտում խորը ճգնաժամի մեջ է:

«Այսօր ես դիմում եմ միջազգային հանրությանը՝ թույլ մի տվեք Ադրբեջանին ձեր ուշադրությունը շեղել կաշառակերությունից և այլ չարիքներից: Պայքարեք մարդու իրավունքների համար, բոլոր նրանց համար, ում բերանը փակում են: Ձեր պայքարն արեք բարձր և հրապարակային: Ադրբեջանի ժողովուրդը պետք է իմանա, որ իր իրավունքները պաշտպանվում են: Խնդրում եմ, կոչ մի արեք միայն իմ ազատ արձակման համար, պահանջեք նաև մյուս քաղբանտարկյալների ազատությունը»,- The New York Times-ում հրապարակված նամակում գրել է Իսմայիլովան: