ՀԱԷԿ-ը 6 ամսով կդադարի գործել 2017-ին

Տնտեսություն 13 Հունիս, 2015 16:15

ՀՀ էներգետիկայի և բնական պաշարների նախարար Երվանդ Զախարյանը վստահեցնում է, որ կա բավականաչափ ժամանակ Մեծամորի (Հայկական) ատոմային էլեկտրակայանի շահագործման լիցենզիայի երկարաձգման հարցին լուծում տալու համար: «Արմենպրես»-ի հետ զրույցում նախարարը տեղեկացրեց, որ հունիսի 13-ին ատոմակայանի ղեկավարության և շահագրգիռ այլ կողմերի հետ խորհրդակցություն են անցկացնելու' հաշվի առնելով հանգամանքը, որ ատոմակայանի աշխատանքը դադարեցվելու է ոչ թե 2016 թվականի սեպտեմբերի 1-ին, այլ 2017-ի գարնանը: «Մենք ժամանակ ունենք, կհասցնենք ամեն ինչ»,- ասաց Երվանդ Զախարյանը:

Նախարարը հայտնեց, որ, 2017-ին' ՀԱԷԿ-ի շահագործման լիցենզիայի երկարաձգման հայտի ուսումնասիրման ընթացքում, ատամոկայանը 6 ամսով կդադարի գործելուց: «Այդ վեց ամսվա ընթացքում պետք է կատարվեն շատ լուրջ վերականգնողական աշխատանքներ՝ անվտանգության, շահագործման հետ կապված, որպեսզի գործողության ժամկետը երկարացվի 10 տարով»,- ընդգծեց Երվանդ Զախարյանը՝ հավելելով, որ այդ աշխատանքների համար նախատեսվում է ծախսել 300 միլիոն դոլար, որը վարկի տեսքով ստացել են ռուսական կողմից:

Հարցին ի պատասխան, թե արդյոք այդ ժամանակ կրկին կանգնելու ենք էլեկտրաէներգիայի սակագնի բարձրացման վտանգի առջև՝ Երվանդ Զախարանն ասաց. «Վերականգնման աշխատանքների համար պետք է ծախսենք 300 միլիոն դոլար, 30 տարվա ընթացքում այդ վարկը պետք է մարենք, որոշակի ազդեցություն 2017 թվականից հետո դա, իհարկե, կունենա սակագների վրա»:

Հայաստանը հյուրընկալել է Ատոմային էներգիայի միջազգային գործակալության (ԱԷՄԳ) կարգավորող մարմնի գործունեության դիտարկման միասնական առաքելությունը' (IRRS): Առաքելությունը Հայաստանում իր աշխատանքն սկսել է այս տարվա հունիսի 1-ին ու ավարտել հունիսի 12-ին: IRRS առաքելության ղեկավար, Շվեյցարիայի Միջուկային անվտանգությունը կարգավորող մարմնի ղեկավար Հանս Վանները, ներկայացնելով առաքելության արդյունքները, նշել է, որ Հայաստանի առջև ծառացած ամենակարևոր մարտահրավերը Մեծամորի ատոմակայանի շահագործման ժամկետի երկարացման խնդիրն է. ՀԱԷԿ-ի շահագործման լիցենզիայի ժամկետն ավարտվում է 2016 թվականի սեպտեմբերի 1-ին: