Ռուսաստանցիների 62 տոկոսը տեղյակ է Հայոց ցեղասպանության մասին

Ութ տարվա ընթացքում ռուսաստանցիների իրազեկվածությունը Հայոց ցեղասպանության եւ Հոլոքոստի վերաբերյալ մեծացել է: Այժմ ռուսաստանցիների 62 տոկոսը տեղյակ է, թե ինչ է տեղի ունեցել 1914-1923թթ. Օսմանյան կայսրությունում հայերի հետ, եւս 80 տոկոսը տեղյակ է հրեաների ցեղասպանության մասին:

«Արմենպրես»-ի փոխանցմամբ, սոցիոլոգիական հարցումն իրականացրել է ռուսական «Լեւադա կենտրոն»-ը: Մայիսի 22-25-ն ընկած ժամանակահատվածում կենտրոնի աշխատակիցները հարցում են անցկացրել 800 մարդու շրջանում: «Տեղյա՞կ եք Հայոց ցեղասպանության մասին» հարցին ռուսների 62 տոկոսը դրական պատասխան է տվել: Նրանցից 51 տոկոսը հայտնել է, որ տեղեկացված է, որ այդ տարիներին Թուրքիան նպատակ ուներ ոչնչացնել հայ ժողովրդին: 11 տոկոսն էլ հայտարարել է, որ Հայոց ցեղասպանության մասին պատմությունները որոշակի կերպով չափազանցված են: Ռուսաստանցիների 22 տոկոսը հայտարարել է, որ երբեք չի լսել հայերի ցեղասպանության մասին, 17 տոկոսն էլ դժվարացել է որեւէ պատասխան տալ:

Նմանատիպ հարցում կենտրոնն անցկացրել էր նաեւ 2007թվականին: Այդ ժամանակ «Տեղյա՞կ եք Հայոց ցեղասպանության մասին» հարցին դրական էր պատասխանել էր ռուսների 50 տոկոսը: Ինչ վերաբերում է Հոլոքոստին, ապա եթե ութ տարի առաջ հրեաների ցեղասպանության մասին գիտեր ռուսների 75 տոկոսը, այժմ այդ թիվը դարձել է 80 տոկոս: