Վառելիքի տեսակների ակցիզային հարկի դրույքաչափի բարձրացումը դրանց գների վրա էական ազդեցություն չի ունենա

Բենզինի, դիզելային վառելիքի և սեղմած գազի ակցիզային հարկի դրույքաչափերի բարձրացումը չի կարող էական ազդեցություն ունենալ դրանց գների վրա:

Այս մասին Ազգային ժողովում «Ակցիզային հարկի մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ, որով նախատեսվում է բարձրացնել վառելիքի տեսակների ակցիզային հարկի դրույքաչափերը, ասաց ՀՀ ֆինանսների նախարարի տեղակալ Վախթանգ Միրումյանը՝ պատասխանելով ԲՀԿ խմբակցության պատգամավոր Տիգրան Ուրիխանյանի հարցին: «Հաշվի առնելով այն հանգամանքը, որ մենք 2014թ. վերջից և այս տարվա սկզբից ունեցել ենք վառելիքի գների որոշակի անկում՝ շուրջ 15-20 տոկոսով, դրու յքաչափերի բարձրացումը չի կարող գների վրա էական ազդեցություն ունենալ»,-  նշեց Միրումյանը:

Անդրադառնալով վառելիքի դրույքաչափերը բարձրացնելու անհրաժեշտությանը՝ Միրումյանն ընդգծեց, որ 2006թ. դրանք հաստատագրվել են և մինչ այս պահը չեն վերանայվել: Միրումյանի խոսքով՝ 10 տարվա ընթացքում վառելիքի գների էական բարձրացում է տեղի ունեցել, ուստի այս նախաձեռնությամբ կառավարությունը փորձում է դրույքաչափերը վերանայելու եղանակով հետ բերել այն կորուստները, որոնք եղել են այդ 10 տարիների ընթացքում վառելիքի գների բարձրացման հետևանքով:

Միրումյանը մանրամասնեց, որ բոլոր այն երկրները, որոնք կիրառում են ակցիզային հարկի հաստատագրված դրույքաչափը, իրենց օրենսդրության մեջ ունեն դրույթ առ այն, որ յուրաքանչյուր տարի գների համեմատությամբ ակցիզային հարկի դրույքաչափերի ինդեքսավորում է տեղի ունենում: Նա նշեց, որ Հայաստանի օրենսդրության մեջ նման դրույթ չկա, ուստի ժամանակ առ ժամանակ դրույքաչափերը վերանայելու անհրաժեշտություն է առաջանում: