Հայաստանի շուկան փոքր է բենզինի վաճառք իրականացնող խոշոր կազմակերպությունների համար

Բենզինի վաճառք իրականացնող համաշխարհային խոշոր կազմակերպությունները Հայաստանում գործունեություն չեն ծավալում՝ ելնելով տնտեսական նպատակահարմարությունից: Ազգային ժողովում «Ակցիզային հարկի մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ այս մասին ասաց ՀՀ ֆինանսների նախարարի տեղակալ Վախթանգ Միրումյանը՝ պատասխանելով ԲՀԿ խմբակցության պատգամավոր Վահան Բաբայանի հարցին, թե ինչո՞ւ Հայաստանում բենզինի առևտրով զբաղվող խոշոր կազմակերպությունները գործունեություն չեն ծավալում: «Թե ինչու բենզինի առևտրով զբաղվող խոշոր կազմակերպությունները Հայաստանում գործունեություն չեն ծավալում, դա պայմանավորված է բազմաթիվ գործոններով: Մասնավորապես, մեր երկրի շուկան շատ փոքր է, իսկ սա շատ կարևոր հանգամանք է նման կազմակերպությունների համար, որոնք բենզալցկայանների հսկայական ցանցեր ունեն աշխարհի տարբեր երկրներում: Նրանք, հավանաբար, տնտե սապես նպատակահարմար չեն համարում Հայաստանում գործունեություն ծավալել»,- «Արմենպրես»-ի հաղորդմամբ՝ նշեց Միրումյանը:

Անդրադառնալով պատգամավորի մյուս հարցին, թե Եվրասիական տնտեսական միությանն անդամակցելը որքանով է ազդել Հայաստանում վառելիքի գների վրա, Միրումյանն ընդգծեց, որ վառելիքի գների 15-20 տոկոս անկումը պայմանավորված է եղել հենց Եվրասիական տնտեսական միությանը Հայաստանի անդամակցությամբ:

Միրումյանն անդրադարձավ նաև Վահան Բաբայանի այն մտահոգությանը, թե «Ակցիզային հարկի մասին» օրենքում առաջարկվող փոփոխությունների հետևանքով բենզինի գները կարող են թանկանալ: Նա նշեց, որ առաջարկվող նախագծով մեկ տոննա բենզինի համար ակցիզային հարկի դրույքաչափի բարձրացումը ընդամենը 8000 դրամով է լինելու, իսկ մեկ լիտրի համար ընդամենը 6 դրամ: «Մեր վերլուծությունները ցույց են տվել, որ 6 դրամ բարձրացումը այն բարձրացումը չէ, որ կարող է էական ազդեցություն ունենալ բենզինի գնի վրա: Ավելին, հավանակությունը մեծ է, որ այն ընդհանրապես ազդեցություն չունենա բենզինի գների վրա»,- մանրամասնեց Միրումյանը: