Հայաստանը Տրանսանատոլիական խողովակաշարի նախագծից դուրս է մնացել Ադրբեջանի պատճառով

Տրանսանատոլիական խողովակաշարի նախագծի (TANAP) մասին որոշումը ընդունել է ադրբեջանական «Շահ դենիզ» կոնսորցիումն, ու Հայաստանը դուրս է մնացել այդ նախագծից Ադրբեջանի պատճառով: Գազ տեղափոխելու ամենակարճ ճանապարհը կլիներ Հայաստանը: «Արմենպրես»-ի փոխանցմամբ, այս մասին Երեւանում ՆԱՏՕ-ի Խորհրդարանական վեհաժողովի ՌՈՈՒԶ ՌՈԹ 89-րդ սեմինարին հայտարարեց Լոնդոնի Թագավորական քոլեջի փորձագետ Թրեյսի Ջերմանը՝ ի պատասխան Իտալիայի պատվիրակության անդամ Ռոբերտո Մաոասուտայի հարցին, թե ինչու Հայաստանը ներգրավված չէ Հարավային Կովկասում էներգետիկ նախագծերում։ «Համաձայն եմ՝ գազ տեղափոխելու ամենակարճ ճանապարհը կլիներ այն Հայաստանի տարածքով անցկացնելը, սակայն աշխարհաքաղաքական իրողությունները խաղացել են իրենց դերը»,- ասաց Ջերմանը։

Տրանսանատոլիական խողովակաշարը «Հարավային գազային միջանցքի» առանցքային հատվածներից է: Դրա միջոցով Կասպից ծովում գտնվող «Շահ-Դենիզ» հանքավայրում արդյունահանված գազը Թուրքիայի տարածքով արտահանվելու է Հարավային Եվրոպա. 2020 թվականի սկզբին 1850 կիլեմետր երկարությամբ TANAP-ը կմիացվի Տրանսադրիատիկ գազատարին, բնական գազ կստանա Հարավկովկասյան գազատարից և այն՝ Իտալիայի, Հունաստանի ու Ալբանիայի տարածքներով կտեղափոխվի Եվրոպա։ Անկարայում և Բաքվում հույս ունեն, որ 2018 թվականից շահագործվելիք այս խողովակաշարով արտահանվող գազի ծավալները տարեցտարի աճելու են: Սկզբնական շրջանում նախատեսվում է արտահանել տարեկան 16 միլիարդ խորանարդ մետր գազ՝ այդ թիվը հասցնելով տարեկան մինչև 31 միլիարդ խորանարդ մետրի: