Սևանա լիճ բաց թողնվեց իշխանի «Գեղարքունի» տեսակի 43 հազար հատ մանրաձուկ

Տնտեսություն 24 Հունիս, 2015 18:45

Գեղարքունիքի մարզի Ծովագյուղի լճափնյա տարածքում և Շորժայի փորձարարական ցանցավանդակային ձկնաբուծական տնտեսությունում «Սևանի իշխանի պաշարների վերականգնման և ձկնաբուծության զարգացման հիմնադրամն» առաջին անգամ իրականացրեց մանրաձկան բացթողում Սևանա լիճ:

«Արմենպրես»-ի տեղեկացմամբ' մանրաձկան լիճ բաց թողնմանը ներկա էին ՀՀ բնապահպանության նախարար Արամայիս Գրիգորյանը, Գեղարքունիքի մարզպետ Ռաֆիկ Գրիգորյանը, «Սևանի իշխանի պաշարների վերականգնման և ձկնաբուծության զարգացման հիմնադրամ»-ի տնօրեն Արշակ Աղաջանյանը, «Սևանի իշխան» ԲԲԸ տնօրեն Էդուարդ Գրիգորյանը, Գեղարքունիքի մարզպետարանի և «Սևան ազգային պարկ» ՊՈԱԿ-ի պատասխանատու աշխատակիցներ, ԶԼՄ ներկայացուցիչներ:

Ինչպես «Արմենպրես»-ին ներկայացրեց «Սևանի իշխանի պաշարների վերականգնման և ձկնաբուծության զարգացման հիմնադրամ»-ի տնօրեն Արշակ Աղաջանյանը, Սևանա լիճ է բաց է թողնվել միջինը 30 գրամ քաշով 43 000 հատ իշխանի «Գեղարքունի» տեսակի մանրաձուկ, որն աճեցվել է Շորժայի փորձարարական ցանցավանդակային ձկնաբուծարանի մայրական կազմից: 40 հազար հատ' 1,2 տոննա ընդհանուր քաշով, «Գեղարքունի» տեսակի մանրաձուկ բաց թողնվեց Ծովագյուղի տարածքում, 3 հազար հատ' Շորժայի ցանցավանդակային տնտեսությունում: «Սևանի իշխան» ԲԲԸ տնօրենի և ՀՀ բնապահպանության նախարարության մասնագետների գնահատմամբ' բաց թողնված մանրաձուկը կենսունակ է և ավելի քան 80 տոկոսով հարմարվելու է լճի պայմաններին»: Սա մանրաձկան արտահերթ բացթողում է Սևանա լիճ: «Սևանի իշխան» ընկերության հետ ձեռք բերված պայմանավորվածության համաձայն' առաջիկայում լիճ բաց կթողնվի ևս 200-300 հազար իշխանի մանրաձուկ: Սա ես միանշանակ համարում եմ կարևոր ծրագիր, և եթե մենք առաջիկա տարիներին կարողանանք իրականացնել մանրաձկան մեծ խմբաքանակների բացթողումներ, արդեն կկարողանանք խոսել Սևանի իշխանի արդյունագործական պաշարների մասին»,- նշեց ՀՀ բնապահպանության նախարար Արամայիս Գրիգորյանը:

Կարևորելով Սևանի իշխանի ձկնապաշարների վերականգնման ծրագիրը՝ Գեղարքունիքի մարզպետ Ռաֆիկ Գրիգորյանը հույս հայտնեց, որ Սևանի իշխանի պաշարներն արդյունագործական քանակության հասցնելուն զուգահեռ մարզում կստեղծվեն հազարավոր աշխատատեղեր:

«Նախատեսվում է ստեղծել մինչև 5 հազար աշխատատեղ' 180-200 հազար դրամ միջին աշխատավարձով»,- հավելեց «Սևանի Իշխան» ԲԲԸ տնօրեն Էդուարդ Գևորգյանը: Վերջինիս հավաստմամբ՝ իշխանի մանրաձկան բացթողումներն իրականացվելու են ամեն տարի, իհարկե, ավելի մեծ ծավալներով' մինչև մի քանի միլիոնի չափով:

Խոսրով Խլղաթյան