Քաղաքակա՞ն, թե՞ հասարակական բողոք. Вести.Ru

Ռուսական Вести.Ru-ն անդրադարձել է Երևանում շարունակվող՝ էլեկտրաէներգիայի սակագնի բարձրացման որոշման դեմ բողոքի ակցիային: Կայքը, մասնավորապես, գրել է.

«Երևանում շարունակվում է էլեկտրաէներգիայի սակագնի թանկացման հետ կապված բողոքի ակցիան: Այժմ հանրահավաքին մասնակցում է 4-6 հազար մարդ: Նրանց պատրաստ է միանալ մինչև 10 հազար մարդ, հայտնում են հանրահավաքի կազմակերպիչները:

Բողոքի ցույցն սկսվել է ուրբաթ օրը՝ հունիսի 19-ին, որի ընթացքում ոստիկանությունը ձերբակալել է ավելի քան 200 մարդու, սակայն նրանք ազատ են արձակվել: Մարդիկ չեն ցրվում նույնիսկ գիշերը: ՀՀ ոստիկանությունը փակել է դեպի նախագահական նստավայր տանող ճանապարհը, իսկ ցուցարարներին փորձել են հանգստացնել պատգամավորները:

Ներկայումս, ցուցարարները պահանջում են չեղյալ հայտարարել սակագների բարձրացման որոշումը: Վարչապետի կամ խորհրդարանի խոսնակի պատասխանը նրանք սպասում են ստանալ օրվա ընթացքում:

Իհարկե, բնակչության համար 7 դրամով գնաճը շատ զգայուն է, քանի որ աշխատավարձերը ցածր են, իսկ տնտեսական իրավիճակը շարունակում է վատթարանալ: Սակագների թանկացումը կհանգեցնի նաև բոլոր ապրանքների և ծառայությունների գների բարձրացմանը:

Քաղաքագետները, տնտեսագետները և ցուցարարները պնդում են, որ այդ բողոքի ցույցերը չեն կրում քաղաքական բնույթ: Իսկապես, քաղաքական պահանջներ չեն հնչել, ոչ ոք չի պահանջում ազգայնացնել ակտիվները: Միակ պահանջը` չեղյալ հայտարարել սակագների աճը:

Նախորդ տարիներին արդեն եղել են նմանատիպ ցույցեր: Օրինակ՝ երկու տարի առաջ բնակչությունը դժգոհ էր հասարակական տրանսպորտի սակագնի բարձրացումից, ինչի արդյունքում իշխանությունները զիջումների գնացին: Այժմ ավելի դժվար կլինի դա անել, քանի որ ՀԷՑ-ը պատկանում է ռուսական ընկերությանը, իսկ սակագների թանկացումը, ըստ երևույթի, արդարացված է՝ ինչպես օրենսդրության, այնպես էլ ֆինանսների առումով:

Հատկանշական է, որ բողոքի ակցիաները ոչ ոք դեռևս չի շտապում օգտագործել քաղաքական «միավորներ» ձեռք բերելու համար: Ընդդիմությունը, թեև քննադատում է գների բարձրացումը, սակայն պաշտոնապես չի միացել ցուցարարներին:

Բացի այդ, ներկայիս իրավիճակը ոչ մի կապ չունի հակառուսական տրամադրությունների հետ, թեև դրանից դժվար կլինի խուսափել բողոքի ուժեղացման դեպքում: Իրավիճակի վատթարացման վտանգն առկա է, եթե միայն իշխանություններն ինչ-որ ձևով չլուծեն խնդիրը:

Կոպիտ ասած՝ դեռևս «Մայդանի» նշաններ Հայաստանում չեն նկատվում, սակայն ամեն ինչ կարող է փոխվել: Մանավանդ, որ ԱՄՆ պետդեպարտամենտը, որը հայտնի է նախկին Խորհրդային Միության երկրներում ժողովրդավարությանն աջակցելու իր քայլերով, չի մոռանում ֆինանսավորման մասին:

Այս տարվա փետրվարին Հայաստան է ժամանել Պետդեպարտամենտի խոսնակ Վիկտորյա Նուլանդը:

Ռոնալդ Ռեյգանի կառավարության նախկին պաշտոնյա Փոլ Քրեյգ Ռոբերթսը նախկինում նշել էր, որ այդ այցը կարող է վկայել հեղաշրջում կազմակերպելու մտադրության մասին:

«Վիկտորյա Նուլանդի այցի նպատակն է՝ պետական հեղաշրջում կազմակերպել ձեր երկրում: Հայաստանում ՀԿ-ների ֆինանսավորման նպատակը՝ ժողովրդին փողոցներ դուրս բերելն է՝ հեղաշրջման և քաղաքական գործիչներին կաշառք առաջարկելու համար»,- ասել է Ռոբերթսը «Երևան Աշխարհաքաղաքական ակումբ» հասարակական կազմակերպության հետ զրույցում: «Ձեզ մոտ նախատեսվում է նույն հեղաշրջումը, որն անցյալ տարի տեղի է ունեցել Ուկրաինայում: Հայաստանը ոչնչացվելու է, և դառնալու է ԱՄՆ-ի վասալ պետություն: Դա Վաշինգտոնին ևս մեկ բազա կտա երկրում, որը նախկին Խորհրդային Միության մասն է կազմել: Հայաստանից հետո հերթը կհասնի Ղազախստանին, Ուզբեկստանին և Ղրղզստանին»: