Պուտինի գործունեությանը հավանության վարկանիշը հասել է առավելագույն ցուցանիշի՝ 89 տոկոսի

ՌԴ-ի նախագահի պաշտոնում Վլադիմիր Պուտինի գործունեությանից գոհ է քաղաքացիների 89 տոկոսը. այս ցուցանիշը բացարձակ ռեկորդ է դիտարկումների ամբողջ ժամանակաընթացքում, «Ինտերֆաքս»-ին հայտնել են «Լևադա Կենտրոնում»՝ ամփոփելով հունիսյան հետազոտության արդյունքները, տեղեկացնում է «Արմենպրես»-ը:

Ապրիլ-մայիս ամիսներին նախագահի պաշտոնում Պուտինի աշխատանքին հավանություն է տվել ռուսաստանցիների 86 տոկոսը, հունվարին՝ 85 տոկոսը, 2014 թվականի հունիսին՝ 86 տոկոսը, 2013 թվականի հունիսին՝ 63 տոկոսը, 2012 թվականի հունիսին՝ 64 տոկոսը:

Նախագահի աշխատանքից այժմ դժգոհ է հարցվածների 10 տոկոսը:

Ռուսաստանի վարչապետի պաշտոնում Դմիտրի Մեդվեդևի գործունեությանը հավանություն է տվել հարցվածների 66 տոկոսը, հավանություն չի տվել 33 տոկոսը:

ՌԴ-ի կառավարության աշխատանքից գոհ է հարցման մասնակիցների 62 տոկոսը, դժգոհ է 37 տոկոսը:

Պետդումայի գործունեությանը հավանություն է տալիս ռուսաստանցիների 54 տոկոսը, հավանություն չի տալիս 44 տոկոսը:

Հարցման մասնակիցներին նաև առաջարկել են նշել 5-6 քաղաքական, հասարակական գործիչների անուններ, որոնց նրանք բոլորից շատ են վստահում:

Առաջին տեղում Պուտինն է. նրա անունը նշել է հարցվածների 64 տոկոսը: Սա ամենաբարձր ցուցանիշն է 2014 թվականի հունվարից ի վեր (այն ժամանակ ցուցանիշը 53 տոկոս էր):

Երկրորդ տեղում ՌԴ-ի պաշտպանության նախարար Սերգեյ Շոյգուն է, որին վստահում է ռուսաստանցիների 28 տոկոսը: Երրորդ հորիզոնականը կիսում են Մեդվեդևը և ՌԴ ԱԳ նախարար Սերգեյ Լավրովը (21-ական տոկոս):

Նրանց հաջորդում են՝ ՌԴԿԿ-ի առաջնորդ Գենադի Զյուգանովը (11 տոկոս), ՌԼԴԿ-ի ղեկավար Վլադիմիր Ժիրինովսկին (9 տոկոս), Դաշնության խորհրդի խոսնակ Վալենտինա Մատվիենկոն (5 տոկոս), պատրիարք Կիրիլը, Մոսկվայի քաղաքագլուխ Սերգեյ Սոբյանինը և «Արդար Ռուսաստան» կուսակցության առաջնորդ Սերգեյ Միրոնովը (4-ական տոկոս):

Ռուսաստանի քաղաքական գործիչներից ոչ ոքի չի վստահում հարցվածների 9 տոկոսը, իսկ 13 տոկոսը հայտարարել է, որ չի հետաքրքրվում քաղաքականությամբ:

Կարծիքն այն մասին, որ, ընդհանուր առմամբ, այժմ երկրում գործերը ճիշտ ուղղությամբ են ընթանում, պաշտպանում է ռուսաստանցիների 64 տոկոսը. սա առավելագույն ցուցանիշն է դիտարկումների ողջ ժամանակաշրջանում:

Հարցումը հունիսի 19-22-ին անցկացվել է ՌԴ-ի 46 տարածաշրջանների 134 բնակավայրերի 1600 մարդկանց շրջանում: Վիճակագրական սխալանքը չի գերազանցում 3,4 տոկոսը: