Սոթքում լուծվում է կաթի մթերման խնդիրը

Գեղարքունիքի մարզի Սոթք գյուղում ավարտին է մոտենում կաթի մթերման կետի ստեղծումը, որի արդյունքում գյուղի ավելի քան 170 տնտեսությունների համար լուծում է ստանում կաթի իրացման խնդիրը:

Ինչպես «Արմենպրես»-ին տեղեկացրեց Սոթքի գյուղապետ Կոլիկ Շահսուվարյանը, ավարտին են մոտենում մթերման կետի շինարարական բոլոր տեսակի աշխատանքները, լուծվում են նաեւ ջրամատակարաման եւ ջրահեռացման խնդիրները, տեղադրվում են սառնարաններ, եւ մի քանի օրերի ընթացքում արդեն գյուղացիները կկարողանան Ակունքի «Էկոկաթ» ձեռնարկությանը հանձնել իրենց տնտեսություններում արտադրված կաթը' 3,6 տոկոս յուղայնության 1 լիտրի դիմաց վճարվելով 120 դրամ:

«Մեր գյուղում այժմ օրական արտադրվում է մինչեւ 2 տոննա կաթ: Իրացման խնդրի լուծումից հետո վստահ ենք , որ արդեն տնտեսությունները կովերը չեն ենթարկի հարկադիր մորթի, այլ նոր եկամուտ ստանալու համար կավելացնեն անասնագլխաքանակը: Կաթի մթերման կետի բացման մեջ մեզ նշանակալի աջակցություն ցուցաբերեց Գեղարքունիքի մարզպետ Ռաֆիկ Գրիգորյանը:»Էկոկաթի ղեկավարությանն էլ շնորհակալ ենք, որ այս դժվարին պահին կանգնում է մեր կողքին' նեցուկ լինելով գյուղացուն»,-նշեց համայնքի ղեկավարը: