ՀԾԿՀ-ն ՀԷՑ-ին տուգանեց 60 մլն դրամով

Տնտեսություն 8 Հուլիս, 2015 13:26

Հանրային ծառայությունները կարգավորող հանձնաժողովը 11 տարբեր որոշումներով 60 մլն դրամի տուգանք սահմանեց «Հայաստանի էլեկտրական ցանցեր» ՓԲԸ-ի համար: Ավելի վաղ ներկայացվել էր տուգանքների սահմանման 14 որոշում, սակայն նիստի օրակարգի հաստատման ժամանակ ՀԾԿՀ զարգացման և մոնիթորինգի վարչության պետ Աբգար Բուդաղյանը հայտնեց, որ ՀԷՑ-ը վերացրել է 3 որոշումներում արձանագրված խախտումները: «Առաջարկվում է օրակարգից հանել 4,5, 6 հարցերը, քանի որ ընկերության կողմից վերացվել են այն թերությունները, որոնք ներառված էին այդ որոշումներում: Դրանցից յուրաքանչյուրի համար սահմաված էր 5 մլն դրամի տուգանք»,- ասաց նա: Նիստին ներկա տնտեսավորղները հաստատեցին, որ արդեն կարգավորել են ՀԷՑ-ի հետ ունեցած խնդիրները:

Տուգանքների վերաբերյալ մյուս որոշումների ներկայացումից հետո ՀԷՑ-ի իրավաբան Տիգրան Սարուխանյանը նշեց, որ տարբեր գրություններով ՀԾԿՀ-ը հնարավորություն էր տվել ՀԷՑ-ին հետաձգել էլեկտրաէներգիայի մատակարարման վերաբերյալ որոշումների իրականացումը մինչև հուլիսի 10-ը, և հանձնաժողովի նիստի օրակարգում ներառված հարցերն անհիմն են: Իսկ ՀԾԿՀ-ի փոխնախագահ Սամվել Արաբաջյանը նշեց, որ հանձնաժողովն արդեն երկու ագամ հետաձգել էր սահմանված ժամկետը, իսկ այդ ընթացքում թերությունները չեն վերացվել, հետևաբար տուգանքները կիրառվելու են: «Եթե կարծում եմ, որ հանձնաժողովի որոշումներն իրավաչափ չեն, դուք կարող եք դրանք բողոքարկել վարչական դատարանում»,- նշեց նա:

ՀԾԿՀ-ի նախագահ Ռոբերտ Նազարյանն էլ ասաց, որ հանձնաժողովը որոշել էր ՀԷՑ-ի նկատմամբ տուգանքներ կիրառելու հարցերը քննարկել դեռևս հուլիսի 1-ին, սակայն ընկերության տնօրեն Եվգենի Բիբինը գրություն էր ուղարկել և խնդրել հետաձգել դրանց քննարկումը: «Գործողություններ կատարելու և խախտումները վերացնելու փոխարեն այսօր եկել եք և մեզ այնպիսի բաներ եք ասում, որ այնքան էլ լուրջ չեն»,- ասաց Նազարյանը՝ դիմելով ՀԷՑ-ի ներկայացուցիչներին:

Վարչական վարույթների ներկայացումից հետո ՀԷՑ-ի գլխավոր տնօրեն Եվգենի Բիբինն ասաց, որ ընկերությունը վերջին տարիներին վատ ֆինանսական վիճակում է եղել և այդ պատճառով է անցել այն գործելաոճին, երբ սպառողը միայն նախանական վճարում կատարելու դեպքում կարող է միանալ ցանցին: «Այդ պահին մեր որոշումը ճիշտ է եղել: Ներկայումս արդեն կարիք չկա նման ձևով աշխատելու, դրա համար այդ որոշումը չեղարկվել է»,- ասաց Բիբինը: ՀԾԿՀ-ի նախագահ Ռոբերտ Նազարյանն էլ նկատեց, որ ընկերությունը իրավունք չի ունեցել նման որոշում կայացնել առանց հանձնաժողովի: «Չեմ կարծում, որ իրավական տեսանկյունից ձեր այդ քայլն ունեցել է հիմքեր»,- ասաց Նազարյանը:

Հանձնաժողով բոլոր անդամները կողմ քվեարկեցին ՀԷՑ-ի նկատմամբ տուգանքներ կիրառելու որոշմանը: