Կառավարությունը պատրաստ է մինչ ամսվա վերջ ամբողջովին վճարել նաիրիտցիների պարտքը

Այսօր կառավարության նիստի մեկնարկին Հովիկ Աբրահամյանը փորձեց հասկանալ, թե ինչու են նաիրտիցները կրկին դժգոհ կառավարությունից, եթե գործադիրը նաիրիտցիներին տված խոստումը կատարել է:

ՀՀ էներգետիկայի և բնական պաշարների նախարար Երվանդ Զախարյանը նշեց, որ պայմանավորվածություն էր ձեռք բերվել մինչև այս տարվա հուլիսի 15-ը վճարել նաիրիտցիների աշխատավարձերի կուտակված պարտքը, որը կազմում է մոտ 5 մլրդ 310 մլն դրամ: «Մենք այսօր հնարավորություն ունենք պարտքը վճարել: Մի շարք աշխատակիցներ, սակայն, անհանգստացած են, քանի որ կարծում են՝ իրենց աշխատավարձերը սխալ են հաշվարկվել: Այդ ուղղությամբ այժմ աշխատանքներ են կատարվում»,- ասաց նախարարը ու հավելեց, որ առաջիկայում այդ հարցին լուծում կտրվի:

Վերջինս նաև նշեց, որ աշխատակիցները ցանկանում են աշխատավարձը միանգամից ստանալ, սակայն, Զախարյանի խոսքով, այս դեպքում նրանք ստիպված են լինելու մոտ տասնհինգ օր սպասել:

Երկխոսությանը միջամտոց ՀՀ Ազգային անվտանգության ծառայության տնօրեն Գորիկ Հակոբյանը. «Մտածում են՝ դուք կվճարեք 200 հոգու աշխատավարձ, և գումարը կավարտվի: Չկա վստահություն մեր իշխանությունների նկատմամբ: Ասում են՝ կհասնեք 20-ին կամ 25-ին, կասեք՝ փող չկա: Ո՞վ կարող է ասել, որ բոլորը կստանան: Պետք է երաշխիք տանք, որ մինչև ամսվա վերջ բոլորը կստանան ու համոզված եմ, որ էլ չեն հավաքվի»,- ասաց Հակոբյանը:

Երվանդ Զախարյանը ամբիոնից հայտարարեց, որ եթե կոլեկտիվի անդամները պատրաստակամ են մինչև ամսվա վերջ սպասել, ապա կառավարությունը միանգամից կվճարի բոլոր աշխատավարձերը: «Իսկ նրանց, ովքեր ցանկանում են այժմ ստանալ, պատրաստ ենք նաև այս ընթացքում կատարել վճարումները: Մենք համաձայն ենք երկու տարբերակին էլ»,- ասաց Զախարյանը, իսկ վարչապետն էլ հավելեց՝ թող իրենք որոշեն, մեզ ասեն: