Ստերլիգովը ԼՂՀ-ից վերադարձել է Մոսկվա՝ «հետախուզության» (տեսանյութ)

Ռուս միլիարդատեր Գերման Ստերլիգովը, ով վերջերս Մոսկվայից տեղափոխվել է Լեռնային Ղարաբաղ, այսօր մեկնել է Ռուսաստանի մայրաքաղաք՝ «հետախուզության»: Նա ասել է, որ առաջիկա օրերին նախատեսում է անցկացնել մի շարք կարևոր հանդիպումներ, որոնց արդյունքում պարզ կլինի, թե արդյոք նա և իր ընտանիքը կկարողանան վերադառնալ Ռուսաստան: Այս մասին հայտնում է LifeNews-ը:

«Ես մտադիր եմ մնալ Ռուսաստանում մի քանի օր, այնուհետև կվերադառնամ ընտանիքիս մոտ՝ Լեռնային Ղարաբաղ: Կախված, թե ինչպես կանցնեն այդ մի քանի օրերը, մենք պետք է որոշենք այստեղ ընտանիքիս հետ միասին վերադառնալու հարցը,- ասել է Ստերլիգովը:- Իմ այցն այստեղ հետախուզության նպատակով է: Ընտանիքիս թաքցրել եմ հուսալի վայրում, իսկ ինքս եկել եմ տեսնեմ` արդյոք ամեն բան կարգին է: Հուսով եմ, որ դա այդպես է: Մենք ցանկանում ենք ապրել Ռուսաստանում, քանի որ մենք ռուս ենք, և այստեղ մեզ դուր է գալիս: Վերջին ժամանակներս Ռուսաստանում շատ հեշտ է դարձել զբաղվել գյուղատնտեսությամբ: Ոչ ոք չի խանգարում, միայն օգնություն իշխանությունների կողմից՝ և՛ շրջանային, և՛ մարզային: Մենք հուսով ենք, որ գյուղատնտեսություն կվարենք ինչպես այստեղ, այնպես էլ Ղարաբաղում: Այնտեղ կաշխատեն մեր գործընկերները»:

Ստերլիգովը նշել է, որ առաջիկա մի քանի օրերին ազատ ժամանակ չի ունենալու, քանի որ բազմաթիվ հանդիպումներ պետք է անցկացնի: Սակայն նա հրաժարվել է բացահայտել դրանց մասին տեղեկությունը:

Միևնույն ժամանակ, գործարարի փաստաբանը LifeNews-ի հետ զրույցում ասել է, որ չկա ոչ մի պատճառ հավատալու նրան, որ իր պաշտպանյալին Մոսկվայում սպասվում է իրավապահ մարմինների հետ շփում: