Չինաստանը հետաքրքրված է «Մետաքսի ճանապարհով». մեկնաբանում է տնտեսագետը

Վերջերս Սերժ Սարգսյանն Ուֆայում մասնակցեց ԲՐԻԿՍ, ԵԱՏՄ և Շանհայան համագործակցության կազմակերպության համատեղ գագաթնաժողովին: 

Համագործակցության արդյունքում կարող է Հայաստան-Իրան երկաթուղային ճանապարհի կառուցումն իրականացվի, որը Պարսից ծոցի միջոցով կապահովի ԵԱՏՄ երկրների ելքը դեպի Հնդկական օվկիանոս: Արդեն պատրաստ է տեխնիկական-տնտեսական հիմնավորումը, և ծրագիրը բաց է պետական-մասնավոր գործընկերության համար:

ԼՈՒՐԵՐ.com-ի թղթակցի հետ զրույցում տնտեսագիտության թեկնածու, դոցենտ Գրիգոր Նազարյանն ասաց, որ համագործակցության առաքելությունը բազմավեկտոր է, դրանով էլ տարբերվում է մյուս միջազգային ինտեգրացիոն կազմակերպություններից:

Ըստ բանախոսի՝ ՈՒՖԱԻ-ի գագաթնաժողովի առաջադրված հիմնական խնդիրը «Մետաքսի ճանապարհ» տնտեսական գոտի ստեղծումն է: «Մեր աշխարհաքաղաքական վիճակն այնպիսին է, որ, կամա, թե ակամա, մենք մենք պետք է լինենք մեր խաչմերուկի տերը: Իրան-Հայաստան երկաթուղու մասին բավականին երկար խոսվել է, հաշվարկվել է, և այստեղ է, որ ՇՀԿ-ն նոր հարթակ է հանդիսանում ներդրումների համագործակցության շրջանակում: Ես կարծում եմ, որ Չինաստանը բավականին մեծ հետաքրքրություն կարող է հանդես բերել հենց «Մետաքսի ճանապարհի» կառուցման առումով:

Տնտեսագետը կարծում է, որ այս ուղղությամբ է հենց պետք աշխատանքներ տանել, և պատահական չէ, որ դեռևս մարտին Չինաստանում քննարկվեց Իրան-Հայաստան երկաթուղու կառուցման խնդիրները: Չպետք է մոռանալ, որ Չինաստանն այսօր պատրաստ է 500 մլրդ-ից ավելի ներդրում կատարել և ոլորտներ է փնտրում:

Հարցին, թե այս կազմակերպության հետ համագործակցությունը արդյոք խնդիր չի առաջացնի Հայաստան-Արևմուտք հարաբերություններին տնտեսագետը հակիրճ պատասխանեց. «Կարծում եմ՝ ոչ»: