Սերգեյ Սիդորսկին լիահույս է ԵԱՏՄ տնտեսության առաջընթացի հարցում

Եվրասիական տնտեսական հանձնաժողովի արդյունաբերության և ագրոարդյունաբերության նախարար Սերգեյ Սիդորսկին կարծում է, որ ԵԱՏՄ անդամ երկրներում տնտեսության առանձին ոլորտների և առևտրաշրջնառության ծավալների աճը հնարավորություն կտա ապագայում խուսափել տնտեսական անկումից: Եվրասիական տնտեսական միության շրջանակներում անդամ ե րկրների արդյունաբերական համագործակցության հիմնական ուղղությունների նախագծի քննարկմանը նվիրված արդյունաբերական համաժողովի ընթացքում լրագրողների հետ զրույցում Սիդորսկին, անդրադառնալով դիտարկմանը, թե տարվա սկզբին ԵԱՏՄ անդամ երկրներում տնտեսական անկման միտումներ են նկատվում, ընդգծեց, որ դա պայմանավորված է համաշխարհային տնտեսության զարգացումներով:

«Ընդհանրապես այս տարի առևտրաարդյունաբերության շրջանառության ծավալների անկում նկատվում է ոչ միայն Եվրասիական տնտեսական միությունում, այլև բոլոր միություններում: Եվ նույնիսկ մեր գլխավոր առևտրային գործընկերների՝ Եվրամիության, Մերձավոր Արևելքի երկրների, Չինաստանի մոտ նման անկում նկատվում է: Նման պայմաններում մեր խնդիրն է ձեռնարկել բոլոր միջոցներն ավելի բարձր նպատակներ հետապնդող տնտեսություն կառուցելու համար: Օրինակ, գյուղատնտեսության ոլորտը ԵԱՏՄ անդամ բոլոր երկրներում աճ է արձանագրել, ինչը խոսում է այն մասին, որ այն ծրագրերը, ո րոնք մենք մատնանշել ենք միության շրջանակներում, ինչպես նաև հաղորդակցման ուղիների ընդլայնումը մեր միությունում արդեն այսօր արդյունք են տալիս: Եվ ես կարծում եմ, որ միության անդամ երկրներում տնտեսության առանձին ոլորտների աճը, բոլոր այն ծրագրերը, որոնք որոշակիացնելու են մեր միության ապագան, թույլ չեն տա, որ տնտեսական անկում գրանցվի»,- «Արմենպրես»-ի հաղորդմամբ՝ նշեց Սիդորսկին:

Սիդորսկին դժվարացավ հստակ պատասխան տալ, թե տարվա վերջին ինչ վիճակում կլինի Եվրասիական տնտեսական միությունը: Նա նշեց, որ այս տարի միության անդամ երկրներից Ղազախստանը մոտ 2 տոկոսի սահմաններում աճ կարձանագրի, Բելառուսն ու Ռուսաստանն անցյալ տարվա տվյակներով 2-3 տոկոսի անկում են արձանագրել: «Ես այսօր հանդիպել եմ ձեր երկրի էկոնոմիկայի և գյուղատնտեսության նախարարների հետ, և կարող եմ ասել, որ ձեզ մոտ ցուցանիշները լավն են»,- ասաց Սիդորսկին՝ ընդգծելով, որ այս պահին հնարավոր չէ միանշանակ ասել՝ տարեվերջին ԵԱՏՄ-ում տնտեսական ցուցանիշներն ինչպիսին կլինեն, քանի որ միության անդամ բոլոր երկրներում կան ոլորտներ, որոնք աճ են արձանագրում, կան ոլորտներ, որտեղ առաջընթաց չկա:

Նա նաև հայտնեց, որ Եվրասիական տնտեսական միության անդամ երկրները ձևավորում են արդյունաբերական համագործակցության հիմնական ուղղությունները նախանշող կարճաժամկետ և միջնաժամկետ ծրագրեր, որին էլ նվիրված է Հայաստանում անցկացվող համաժողովը: «Մենք առաջին անգամ միության շրջանակներում նման գործելաոճ ենք որդեգրել: Խորհրդային Միության անկումից հետո ստեղծված ինտեգրացիոն միություններում այսպիսի մոտեցում երբեք չի եղել: Մենք առաջիկա 5 տարիների համար մշակելու ենք արդյունաբերական համագործակցության արդյունավետ ծրագրեր »,- նշեց նա: