ՀԱԷԿ-ի գործող բլոկի նոր էներգաբլոկով փոխարինումը 2027 թվականին տնտեսապես հիմնավորված է

Հայաստանում նոր միջուկային էներգաբլոկի շահագործման հանձնումը նախատեսված է մինչև 2027 թվականը: Այս մասին հայտարարեց ՀՀ էներգետիկայի և բնական պաշարների նախարարի տեղակալ Արեգ Գալստյանը «Հայաստանի էներգետիկ համակարգի երկարաժամկետ (մինչև 2036 թվականը) զարգացման ուղիները» խորագրով ծրագրի շնորհանդեսի ժամանակ: Նրա խոսքով' ՀՀ էներգետիկ համակարգի ներկայիս հնարավորությունների ու զարգացման հեռանկարների շուրջ կատարված ուսումնասիրությունների ու վերլուծությունների արդյունքում մասնագետները մինչև 2036 թվականը էներգետիկ ոլորտի զարգացման ծրագրում ուսումնասիրել են զարգացման տարբեր սցենարներ: «Բոլոր դիտարկված տարբերակներում գործող միջուկային բլոկի փոխարինումը 2027 թվականին նոր էներգաբլոկով տնտեսապես հիմնավորված է և անհրաժեշտ է՝ ելնելով երկրի ռազմավարական դրույթներից»,- «Արմենպրես»-ի հաղորդմամբ' ասաց Գալստյանը:

Փոխնախարարն ավելացրեց, որ մինչև 2036 թվականը զարգացման ծրագրում հաշվի է առնվել նաև էներգախնայող տեխնոլոգիաների ներդրումը բոլոր բնագավառներում: Վերականգնվող էներգետիկայի բնագավառում դիտարկվում է փոքր ՀԷԿ-երի կառուցում գումարային 150 ՄՎտ հզորությամբ, մինչև 2021թ.՝ հաշվի առնելով տեսակարար ներդրումների աճը և բնապահպանական պահանջների ապահովումը՝ մասնավոր ներդրումների հաշվին: Առաջարկվում է միջին հզորության ՀԷԿ-երի (Լոռիբերդ-66 ՄՎտ և Շնող-70 ՄՎտ) զարգացում և շահագործման հանձնում 2021թ., ինչը կավելացնի տարեկան արտադրանքը շուրջ 500 մլն կՎտժ՝ մա սնավոր ներդրումների հաշվին:

Շնորհանդեսի ժամանակ ՀՀ վարչապետ Հովիկ Աբրահամյանը ևս հայտարարել էր, որ շարունակվում են բանակցությունները հնարավոր ներդրողների հետ ՀՀ-ում նոր միջուկային էներգաբլոկի կառուցման ծրագրի իրականացման համար: