ԱՄՆ-ի նախագահի թեկնածուն վարկաբեկվել է ադրբեջանցի օլիգարխի հետ բիզնես ստեղծելու պատճառով

ԱՄՆ-ում առաջիկա նախագահական ընտրություններում Հանրապետական կուսակցության ամենաբարձր վարկանիշն ունեցող թեկնածու Դոնալդ Թրամփը խիստ քննադատության է արժանացել Ադրբեջանի տրանսպորտի նախարար Զիյա Մամեդովի որդու՝ օլիգարխ Անար Մամեդովի պատճառով: Ամերիկյան հեղինակավոր Mother Jones հրատարակությունը հուլիսի 29-ի համարում «Դոնալդ Թրամփը համատեղ բիզնես է ստեղծել կասկածելի ադրբեջանցի օլիգարխի հետ» վերնագրով մերկացնող հոդված է տպագրել:

Ինչպես հաղորդում է «Արմենպրես»-ը, ամերիկյան հրատարակությունը, մասնավորապես, գրում է, որ Դոնալդ Թրամփը համագործակցում է բարձրաստիճան ադրբեջանցի չինովնիկի որդու հետ, որը «պաշտոնն օգտագործում է իր ընտանիքը հարստացնելու համար»:

«Աշխարհի շատ քաղաքներում կան ամերիկացի միլիարդատիրոջ անունով շքեղ հյուրանոցներ: Սակայն նրանցից մեկը հատուկ ուշադրություն է գրավում: Եվ դա նավթով հարուստ Ադրբեջանի մայրաքաղաքում Trump İnternational Hotel & Tower Baku նախագծով կառուցված 33 հարկանի Tramp Towers Hotel-ն է, որի բացումը նախատեսված է տարվա վերջին: Դոլադ Թրամփի բիզնես գործընկերն այստեղ այդ երկրի տրանսպորտի միլիարդատեր նախարարի որդին է: Տարբեր ԶԼՄ-ներ գրում են, որ Մամեդովները հարստություն են դիզել հայր-նախարարի քաղաքական կապերի շնորհիվ»,- գրում է Mother Jones-ը:

Նշվում է, որ հիշյալ հյուրանոցն անձամբ Թրամփին չի պատկանում: Այն կառուցել է Մամեդովներին պատկանող Garant հոլդինգը, և համապատասխանաբար պատկանում է այդ ընտանիքին: Սակայն հյուրանոցն իր անունով կոչելու համար Թրամփը միայն անցյալ տարի 2,5 մլրդ դոլար է ստացել: Բացի այդ հյուրանոցը կառավարվելու է որպես Թրամփի անունը կրող շքեղ հյուրանոցների լայն ցանց:

Ֆինանսական փաստաթղթերից հրատարակությանը հայտնի է դարձել, որ Անար Մամեդովին պատկանող հյուրանոցի կառավարման համար սետղծվել են THC Baku Hotel Manager Services LLC, THC Baku Hotel Manager Services Member Corp, THC Baku Services LLC, THC Baku Services Member Corp և այլ ընկերություններ, որոնցից չորսի 100 տոկոս բաժնետոմսերը պատկանում են Դոնալդ Թրամփին:

Mother Jones-ն անդրադարձել է նաև ԱՄՆ-ում Անար Մամեդովի լոբբիստական գործունեությանը:

«Անար Մամեդովի անունը հաճախ է հիշատակվում տաբեր տեսակի սկանդալներում: Մասնավորապես, որոշ ԶԼՄ-ներ գրել էին, որ նա Ադրբեջանում հազար դոլարով խորոված է պատվիրել արջի մսից: Ինքը՝ Անար Մամեդովը, հերքել է այդ պնդումները և դատի տվել այդ մասին հայտնած ԶԼՄ-ներին: Մեր թղթակիցները Անար Մամեդովի գործունեության վերաբերյալ հարցեր են ուղարկել նրա «Ամերիկա-Ադրբեջան» Դաշինք կազմակերպությանը, բայց դրանք մնացել են անպատասխան»,- գրում է Mother Jones-ը: