Արարատի մարզում արտադրվել է ավելի քան 35 հազար տոննա ծիրան

Արարատի մարզում այս տարի արտադրվել է ավելի քան 35 հազար տոննա ծիրան: Հուլիսի վերջի տվյալներով՝ շուրջ 1500 տոննա մթերել են մարզի գործարանները: Ամենից շատ մթերումն իրականացրել են երեք գործարաններ. «Արտֆուդ» Արտաշատի պահածոների գործարանը մթերել է 550տ ծիրան, Պռոշյանի կոնյակի գործարանի Այգավանի մասնաճյուղը' 260տ և «Վեդի Ալկո» ՓԲԸ-ն' 420 տոննա: Մթերումն իրականացվել է 60 դրամով:

Բացի ներքին շուկայում սպառումից և գործարանների կողմից մթերումից, 8400 տոննա ծիրան է սպառվել նաև սառնարանային տնտեսությունների միջոցով: «Արմենպրես»-ի թղթակցի հետ զրույցում Արարատի մարզպետարանի աշխատակազմի գյուղատնտեսության և բնապահպանության վարչության պետ Հայկազ Տերտերյանն ասաց, որ վերջին տարբերակով մթերում է իրականացվել տարբեր գներով' սեզոնի սկզբում 1500 դրամով, ապա սակագիրնը նվազել է' հասնելով 300-ի:

Մարզում ամենից շատ ծիրան է արտադրվել 2013 թվականին' 40 հազար տոննա: Նախորդ տարի ցրտահարությունը ոչնչացրեց ծիրանի բերքը դեռևս ծաղկի շրջանում: Իսկ այս տարի մայիսի երկրորդ տասնօրյակում մարզում մի քանի անգամ տեղացած կարկուտը փչացրեց ծիրանի ողջ բերքի 20 տոկոսը' ազդելով ապրանքային տեսքի վրա: Կարկուտի հետևանքով ոչնչացած ծիրանի քանակը չնչին է:

Սառնարանային տնտեսությունների կողմից մարզից արտահանվել է նաև 50 տոննա վաղահաս դեղձ:

Լիլիթ Մաճկալյան