Թուրքիայում դրությունը վերահսկողությունից դուրս է գալիս. The Times

Թուրքիայի համար մտահոգիչ ժամանակաշրջան է, եւ պարզ չէ, թե Անկարան ինչպես պետք է կարողանա հաջողությամբ հաղթահարի այն: Այս մասին, ինչպես հաղորդում է «Արմենպրես»-ը, հայտնում է անգլիական հեղինակավոր The Times թերթը' անդրադառնալով Թուրքիայի արեւելյան եւ հարավարեւելյան քրդաբնակ տարածաշրջանում թուրքական անվտանգության ուժերի եւ բնակչության միջեւ ստեղծված լարվածությանը:

«Մասնագետները գտնում են, որ ներկայում Թուրքիան կանգնած է լայնածավալ ներքին պատերազմի առաջ», -թերթի հետ զրույցում հայտնել է Միացյալ Թագավորության ծառայությունների ինստիտուտի աշխատակից Մայքլ Սթեփհենսը:

«Չեմ ուզում Թուրքիայում ստեղծված դրությունը ներքին պատերազմ անվանել, սակայն, իրավիճակը դուրս է գալիս վերահսկողությունից: Թուրքիայի համար խիստ մտահոգիչ ժամանակաշրջան է, եւ դեռ պարզ չէ, թե Անկարան ինչպես պետք է հաղթահարի դա», -ասել է նա:

Անգլիացի փորձագետի կարծիքով' վերջին երեք շաբաթների ընթացքում Թուրքիայում ստեղծված անկայունությունը բեւեռացրել է երկիրը: Հունիսին տեղի ունեցած խորհրդարանական ընտրություններում իշխող «Արդարություն եւ զարգացում» կուսակցության (ԱԶԿ) օգտին քվեարկած բազմաթիվ քրդեր կորցրել են կուսակցության նկատմամբ վստահությունը: Դրա հետ միասին Քուրդիստանի աշխատավորական կուսակցությանն (PKK) ուղղված Թուրքիայի նախագահ Թայիփ Էրդողանի կոշտ դիրքորոշումը կարող է մեծացնել թուրք ազգայնականների մոտ նրա նկատմամբ աջակցությունը», -նշել է Մայքլ Սթեփհենսը:

Բրիտանական Անվտանգության եւ զարգացման քաղաքականությունների ինստիտուտի՝ Թուրքիայի գծով մասնագետ Գերեթ Ջենքինսի կարծիքով' Էրդողանն ու նրա կուսակցությունը երկու նպատակ են հետապնդում:

«Առաջինը, խորհրդարանական քրդական Ժողովուրդների դեմոկրատական կուսակցությանը (HDP) կապելով բռնությունների կողմնակից խմբերի հետ՝ ԱԶԿ-ն ցանկանում է վերացնել HDP-ի նկատմամբ քրդերի վստահությունը եւ նոր ընտրություններում ստանալ ազգայնականների քվեները: Դա ռիսկային ռազմավարություն է: Հնարավոր է' կարճաժամկետ շրջանում ԱԶԿ-ն դարձյալ մեծամասնություն ձեռք բերի, սակայն, դա մեծ վնաս կհասցնի թուրքական հասարակության հենքին», -նշել է Գերեթ Ջենքինսը: