Հայ-իրանական էլեկտրահաղորդման երրորդ գծի կառուցման աշխատանքները կսկսվեն հաջորդ շաբաթվանից

Մի քանի օր առաջ ստորագրվել է Իրան-Հայաստան էլեկտրահաղորդման երրորդ գծի կառուցման պայմանագիրը, ինչը նշանակում է, որ գործընթացն սկսված է: Այդ մասին կառավարության նիստում հայտարարեց ՀՀ վարչապետ Հովիկ Աբրահամյանը՝ ավելացնելով, որ շինարարությունը կսկսվի հաջորդ շաբաթ: «Համոզված եմ, որ Իրանի հետ համագործակցոթյունը հատկապես էներգետիկ ոլորտում կնպաստի երկու երկրների միջև ապրանքաշրջանառության ծավալների զգալի աճին: Հայաստանի կառավարությունը ողջունում է Իրանի միջուկային ծրագրի շուրջ համաձայնությունն ու կարևորում Իրանի ու միջազգային միջոնրդների կառուցողական ջանքերը: Պետք է արձանագրել, որ սրանով տարածաշրջանում երկարատև խաղաղության և կայունության հասնելու հարցում կարևոր քայլ է կատարվել»,-  ասաց վարչապետը:

Հովիկ Աբրահամյանի խոսքով՝ Իրանը Հայաստանի համար կարևոր ու հուսալի երկիր է, իսկ մեր ժողովուրդները դարերի պատմություն ունեն: Վարչապետի խոսքով՝ ինքը լիահույս է՝ Հայաստանի և Իրանի տնտեսական հարաբերությունները նոր մակարդակի են հասել, և հայկական կողմը ջանք չի խնայելու իրացնելու բոլոր հնարավորությունները:

Իրանական «Սանիր» և Հայաստանի էներգետիկայի ու բնական պաշարների նախարարությունը ներկայացնող Բարձրավոլտ էլեկտրացանցեր (HVEN) ընկերությունը վերաստորագրել են Իրան-Հայաստան էլեկտրահաղորդման 3-րդ բարձրավոլտ գծի կառուցման վերաբերյալ պայմանագիրը: 107 մլն եվրո արժողությամբ պայմանագիրն ունի ռազմավարական նշանակություն և նախատեսվում է ավարտին հասցնել 24 ամսից: Իրանի Արտահանումների բանկը ստանձնել է նախագծի 70 տոկոս ֆինանսավորումը, իսկ մյուս մասը՝ «Սանիր» ընկերությունը: