Ադրբեջանը վեր է ածվում բռնապետության, Եվրոպան չպետք է տրվի խավիարային դիվանագիտությանը. The Guardian

Համաշխարհային Մամուլ 13 Օգոստոս, 2015 23:16

Եվրոպական երկրների կառավարությունները անհապաղ պետք է հանդես գան Ադրբեջանի նախագահ Իլհամ Ալևի բռնաճնշումների դեմ: Նրանք պետք է հստակ պայմաններ թելադրեն Արդբեջանի հետ հարաբերություններում՝ անհապաղ ազատություն պահանջելով Լեյլա և Արիֆ Յունուսների, մարդու իրավունքների ակտիվիստների և քաղբանտարկյալների համար: «Արմենպրես»-ի փոխանցմամբ՝ այս մասին գրում է բրիտանական հեղինակավոր The Guardian թերթը՝ խստորեն քննադատելով հարևան երկրում մարդու իրավունքների դեմ իրականացվող ոտնձգությունները և եվրոպական երկրների անտարբեր քաղաքականությունն այդ ամենի հանդեպ:

Ադրբեջանում oգոստոսի 14-ին կավարտվի մարդու իրավունքների պաշտպան ակտիվիստներ Լեյլա և Արիֆ Յունուսների դատավարությունը: «Քաղաքացիական հասարակության դերակատարները պետք է կարողանան աշխատել առանց խոչընդոտների և հաշվեհարդարի վախի: Մարդու հիմնարար, քաղաքացիական և քաղաքական իրավունքների պաշտպանությունը պետք է վեր դասվի տնտեսական և աշխարհաքաղաքական շահերից»,- նշում է թերթը:

Խաղաղության և ժողովրդավարության ինստիտուտի տնօրեն Լեյլա Յունուսը մեղադրվում է խարդախության, կեղծիքի, հարկերից խուսափելու և անօրինական ձեռներեցությամբ զբաղվելու մեջ: Նա կարող է դատապարտվել 11 տարվա բանտարկության: Լեյլա Յունուսի ամուսինը, ով նույնպես մեղադրվում է մեծածավալ խարդախության մեջ, կարող է բանտարկվել ինը տարով: «Յունուսների դեմ կայացված դատարանի որոշումը որպես մահվան դատավճիռ կհնչի այդ երկրի երբեմնի կենսունակ քաղաքացիական հասարակության համար: Քաղաքացիական հասարակությունը, որ մի ժամանակ ազդեցիկ կերպով դեմ դուրս եկավ Եվրատեսիլ երգի մրցույթը Բաքվում 2012-ին անցկացնելու որոշմանը, այժմ գտնվում է ցնցոտիների մեջ»,- գրում է բրիտանական լրատվամիջոցը:

Թերթը նշում է, որ ավելի քան մեկ տասնամյակ Ադրբեջանն անամոթաբար խավիարային դիվանագիտություն է վարել՝ եվրոպական երկրների կառավարություններին և իր համար կարևոր նավթի և գազի սպառողներին իր կողմը գրավելու համար: Ի պատասխան, Եվրոպան աչք է փակել Ադրբեջանում մարդու իրավունքների խախտումների նկատմամբ: «Հանուն Լեյլա և Արիֆ Յունուսների և ժողովրդավարության համար պայքարող ադրբեջանցի բոլոր ակտիվիստների, անպատժելիության մթնոլորտին պետք է վերջ տրվի հիմա»,- ընդգծում է The Guardian-ը: