Պարույր Սևակ համայնքն ընդգրկվեց սոցիալական արտոնություններից օգտվող սահմանամերձ համայնքների ցանկում

ՀՀ կառավարությունն օգոստոսի 18-ին կայացած նիստում սոցիալական աջակցություն ստացող սահմանամերձ համայնքների ցանկում ներառեց նաև ՀՀ Արարատի մարզիի Պարույր Սևակ համայնքը: Մեկ այլ նախագծով լրացում կատարվեց մարտական գործողությունների հետևանքով չօգտագործվող հողատարածքներ ունեցող այն սահմանամերձ գյուղական համայնքների ցանկում, որտեղ իրականացվող գործունեությունն ազատվում է հարկերից:

«Որոշումը նպատակ ունի խրախուսել Պարույր Սևակ համայնքի տնտեսական ակտիվությունը և ցուցաբերել սոցիալական աջակցություն»,-«Արմենպրես»-ի փոխանցմամբ՝ ասաց ՀՀ տարածքային կառավարկան և արտակարգ իրավիճակների նախարարի առաջին տեղակալ Վաչե Տերտերյանը:

Նշված ցանկում ընդգրկված են Արարատի մարզի Երասխ, Վայոց Ձորի Խաչիկ, Խնձորուտ, Սերս, Նոր Ազնաբերդ, Բարձրունի,Գեղարքունիքի Վահան և Տավուշի մարզի Ներքին Կարմիրաղբյուր, Ոսկեվան, Չորաթան, Կողբ, Վազաշեն, Բերքաբեր, Չինարի, Արծվաբերդ, Ծաղկավան (Իջևանի շրջան), Մովսես, Դովեղ, Պառավաքար, Բերդավան, Բարեկամավան, Կոթի, Բաղանիս, Սարիգյուղ, Այգեձոր, Կիրանց, Այգեպար, Սևքար, Այգեհովիտ, Ոսկեպար և Վերին Կարմիրաղբյուր համայնքները:

Նշված համայնքների բնակիչներն օգտվում են ՀՀ կառավարության կողմից սահմանված տարբեր արտոնություններից, մասնավորապես, ազատված են հողի հարկից և ոռոգման ջրի վարձից, վճարում են օգտագործած գազի ու էլեկտրաէներգիայի վարձի միայն կեսը: