Կենտրոնական բանկի օժանդակությունը Չինաստանի բորսաներին չօգնեց կասեցնել անկումը

Չինաստանի ֆոնդային սակարաններում սակարկությունները փակվել են գնանշումների անկմամբ, չնայած հանգուցային դրույքաչափը նվազեցնելու Չինաստանի ժողովրդական բանկի որոշմանը՝ երկրի տնտեսության աճի դանդաղման երկյուղների ֆոնին, տեղեկացնում Է «Արմենպրես»-ը՝ հղում անելով BBC-ին:

Shanghai Composite ինդեքսը ցերեկն աճել Է 3,1 տոկոսով (մինչեւ 3,054.97)՝ հետ բերելով առավոտյան տանուլ տվածը, սակայն սակարկությունների ավարտին սակարանը փակվել Է 1,27 տոկոս (2,927.29) նվազմամբ:

Օգոստոսի 26-ին Ասիայի սակարաններում անկայունություն Էր տիրում ներդրողների այն երկյուղների պատճառով, որ դրույքաչափի նվազումը բավական չի լինի Չինաստանի դանդաղած տնտեսությունը խթանելու եւ երկրի ընկերությունների բաժնետոմսերի կտրուկ անկումը դադարեցնելու համար:

Այս շաբաթ Shanghai Composite ինդեքսը կորցրել Է 16 տոկոս, ինչը հանգեցրել Է ամբողջ աշխարհում ֆոնդային շուկաների փլուզման, որը խոշորագույնն Է վերջին ութ տարում:

Չինաստանի ժողովրդական բանկը, փորձելով հանգստացնել շուկաները, որոշել Է օգոստոսի 26-ից 0,25 տոկոսով՝ մինչեւ 4,6 տոկոս իջեցնել վերաֆինանսավորման դրույքաչափը՝ վերջին երկու օրվա ընթացքում սակարանային հիմնական ինդեքսների կտրուկ անկումից հետո:

Փորձելով կայունացնել իրավիճակը՝ Չինաստանի կենտրոնական բանկն օգոստոսի 25-ի առավոտյան ֆինանսական համակարգ Է ներարկել 150 միլիարդ յուան (22,4 մլրդ դոլար):