Լարելու ենք մեր ուժերը, որպեսզի կարողանանք տնտեսական աճ արձանագրել. Հովիկ Աբրահամյան

Սեպտեմբերի 8-ին Բելառուսում տեղի է ունենալու Եվրասիական տնտեսության միության երկրների վարչապետների հանդիպումը, որի ընթացքում կքննարկվեն տնտեսական համագործակցության զարգացմանն ուղղված մի շարք հարցեր: Այդ մասին լրագրողների հետ զրույցում տեղեկացրեց ՀՀ վարչապետ Հովիկ Աբրահամյանը՝ խոսելով տնտեսության զարգացման հետագա քայլերի վերաբերյալ:

Նրա խոսքով՝ Հայաստանի տնտեսական վիճակի վրա ազդում է նաև տարածաշրջանային տնտեսական վիճակը, ուստի ամեն ինչ չէ, որ կախված է Հայաստանի կառավարությունից։ Հովիկ Աբրահամյանը նկատեց, որ Հայաստանի տնտեսությունը համեմատ ԵԱՏՄ երկրների, լավ վիճակում է, առաջին կիսամյակում արձանագրվել է 4 տոկոս տնտեսական աճ, փոխարենը Ռուսաստանում, Բելառուսում և Ղազախստանում առկա է տնտեսական անկում:

«Տարածաշրջանային մակարդակով Հայաստանի տնտեսությունը գտնվում է բարվոք վիճակում: Պետք է փորձենք լրացուցիչ ներդրումներ ներգրավել: Մենք դանդաղ շտապում ենք առաջ, պարզապես ամեն ինչ չէ, որ կախված է ՀՀ կառավարությունից, կան տարածաշրջանային խնդիրներ, նաև ԵԱՏՄ երկրներից է կախված մեր տնտեսության ապագան»,- «Արմենպրես»-ի փոխանցմամբ' ասաց կառավարության ղեկավարը:

Նրա խոսքով՝ ՀՀ կառավարությունը փորձում է ակտիվ գործունեություն ծավալել նաև հարևան Իրանի և Վրաստանի հետ: Արդեն իսկ սկսվել են հայ-իրանական էլեկտրահաղորդման 3-րդ գծի կառուցման աշխատանքները, իսկ Հովիկ Աբրահամյանի գնահատմամբ, Վրաստանի հետ արդյունավետ համագործակցություն է ծավալվում առավել քան երբևէ:

«Սեպտեմբերից մեր շատ լարված աշխատանք է սպասվում, լարելու ենք մեր ուժերը, որպեսզի կարողանանք տնտեսական աճ արձանագրել»,- ասաց վարախպետը:

ՀՀ Ազգային վիճակագրական ծառայության հրախարակած տվյալների հաաձայն՝ առաջին կիսամյակում ՀՀ-ում արձանագրվել է 4,4 տոկոս տնտեսական աճ: