Վիրահայերը Հանրապետական կուսակցությանը կտան 100 հազար ձա՞յն

«Վիրահայերի միասնություն»–ը սատարում է Հայաստանի Հանրապետական կուսակցությանը։ Այդ մասին լրագրողների հետ հանդիպմանը հայտնեց «Վիրահայերի միասնություն» հ/կ–ի համանախագահ, ԱԺ ՀՀԿ խմբակցության պատգամավոր Տաճատ Վարդապետյանը, ով պատրաստվում է նաև ընդգրկվել կուսակցության շարքերը։ Նախորդ ընտրություններում Վարդապետյանը ՀՀԿ համամասնական ցուցակի 37 համարն էր, իսկ այս տարի՝ 107-րդը։

Վերջինս հիշեցրեց, որ «Վիրահայերի միություն»-ը իշխող կուսակցությանը սատարել է նաև նախորդ խորհրդարանական ընտրություններում։ Հաջորդ գումարման խորհրդարանում հայտնվելու դեպքում Վարդապետյանը պատրաստվում է բարձրացնել հայ–վրացական սահմանի հատման գործընթացի հեշտացման հարցը, որպեսզի վիրահայերի համար ավելի հեշտ լինի գալ հայրենիք, փաստաթղթերի հավաքման և ներկայացման փուլը դառնա ավելի դյուրին և պակաս ժամանակատար: 

Անդրադառնալով այն հարցին, թե մոտավոր հաշվարկներով քանի վիրահայ իր քվեն կտա Հայաստանի Հանրապետական կուսակցությանը, Վարդապետյանը պատասխանեց. «Ոչ պակաս քան 100 հազարը»։