Apple ընկերությունը ներկայացրել է iPhone 6S-ը և iPhone 6S Plus-ը

Apple ընկերությունը ներկայացրել է նոր սմարթֆոնի երկու մոդելները՝ iPhone 6S-ը և iPhone 6S Plus-ը, տեղեկացնում է «Արմենպրես»-ը՝ հղում անելով BBC-ին:

Սարքերն ստացել են նույն դիզայնը, ինչ որ դրանց նախորդները, սակայն կորպորացիայի ղեկավար Թիմ Քուկի խոսքով՝ սմարթֆոնի մեջ փոխվել է «բառացիորեն ամեն ինչ»: Նախորդ տարբերակից միակ տեսանելի տարբերությունը սարքի նոր գույնն է՝ «վարդագույն ոսկի»:

Մասնավորապես, դևայսը հանդերձված է 3D Touch տեխնոլոգիայով. Force Touch-ի երկրորդ սերունդը, որը թույլ է տալիս որոշել սեղմման ուժի երեք աստիճանները:

iPhone-ը նաև ստացել է նորացված խցիկ. 12 մեգապիքսել՝ նախորդ մոդելի 8 մեգապիքսելի փոխարեն: Այն կտեսագրի 4K լուծաչափով՝ 4096 x 2160 պիքսել:

iPhone-ի նոր մոդելները վաճառքի կհանվեն սեպտեմբերի 25-ին: ԱՄՆ-ում պայմանագրով գնելիս արժեքը կկազմի 199-ից մինչև 399 դոլար՝ 6S մոդելի համար, 6S Plus մոդելը կարժենա 299-ից մինչև 499 դոլար:

Նոր գործառնական համակարգը՝ iOS 9-ը, սեպտեմբերի 16-ին մատչելի կլինի նոր և հին սմարթֆոնների ներբեռնման համար: Ավելի վաղ խորհրդաժողովի ընթացքում ընկերությունը ներկայացրել է iPad Pro նոր պլանշետը՝ 12,9 դյույմ անկյունագծով, ինչպես նաև հաջորդ սերնդի Apple TV-ն: