Կարեն Ճշմարիտյանը հիմնական էներգակիրների գնումը ռուբլով ցանկալի, բայց դեռևս անհնար է համարում (տեսանյութ)

ՀՀ էկոնոմիկայի նախարար Կարեն Ճշմարիտյանը ցանկալի է համարում նավթամթերքների ու գազի գնումը կատարել այն երկրի ազգային դրամով, որտեղից Հայաստանը գնում է: Այս մասին լրագրողների հետ ճեպազրույցում խոսեց նախարարը` անդրադառնալով օրեր առաջ վարչապետ Հովիկ Աբրահամյանի կոչին` ուղղված տեղական գործարարներին, որ ԵԱՏՄ տարածքում վճարումները կատարվեն ռուբլով:

«Մեր գործընկերների արձագանքից է կախված դա հնարավոր է, թե ոչ: Լավ կլիներ, որևէ երկրից գնվող ապրանքների դիմաց տվյալ երկրի դրամով վճարեինք: Մասնավորապես, մեր առևտրի մեջ մեծ է նավթամթերքների ու գազի ծավալը, հետևաբար այդ մասով նախընտրելի է առևտուրը կատարել այդ երկրի դրամով: Այս պահին դեռ համաձայնություն չկա»,- ասաց Կարեն Ճշմարիտյանը:

Լրագրողի այն դիտարկմանն ի պատասխան, որ Եվրասիական տնտեսական հանձնաժողովի կանխատեսման համաձայն Հայաստանը կունենա ոչ ավելի, քան 0.9 տոկոս տնտեսական աճ, մինչդեռ ՀՀ բյուջեով 4.1 տոկոս աճի մասին է խոսվում, նախարարը նշեց. «Մինչ տարվա սկիզբը եղած կանխատեսումների և իրականության տարբերությունը պետք է ինչ-որ բանի մասին հուշի, եկեք չկենտրոնանանք, ամեն մեկս աշխատենք մեր տեղում, ավելի լավ արդյունքներ կլինեն»:

Նա նշեց, որ ամեն ինչ արել են ու անում են, որ ապահովեն նախանշված ցուցանիշները: «Արտաքին ազդեցությունների կանխատեսումը բավականին անշնորհակալ գործ է: Երբ առաջին կիսամյակում ներքին ռեսուրսների որոշակի մոբիլիզացիա է գնում, արտաքին ազդեցությունները հնարավոր են լինում չեզոքացնել: Դրա անդրադարձը կամ նյութական արդյունքը համատարած հանրության վրա այդքան արագ չի կարող երևալ և' տեսականորեն, և' պրակտիկորեն, քանի որ կապիտալի վերահսկման խնդիր կա, եկամուտների տարածվածոթյան խնդիր կա: Մենք բոլոր ջանքերը պետք է դնենք աջակցելու գործարարությա նը»,-եզրափակեց նախարար Ճշմարիտյանը:

Տեսանյութը` 1in.am-ի