Իշխանությունների քաղաքականությունն Ադրբեջանը տանում է միջազգային մեկուսացման. «Մուսավաթ»

Ադրբեջանի իշխանությունների քաղաքականությունը երկիրը տանում է միջազգային մեկուսացման:

Այս մասին, ինչպես հաղորդում է «Արմենպրես»-ը, «Թուրան» լրատվական գործակալությանը և «Ամերիկայի ձայն» ռադիոկայանին տված հարցազրույցում հայտարարել է Ադրբեջանի «Մուսավաթ» կուսակցության առաջնորդ Արիֆ Հաջիլըն' մեկնաբանելով Ադրբեջանի դեմ պատժամիջոցների կոչով Եվրախորհրդարանի ընդունած բանաձևը:

«Ձախողվել է Ադրբեջանի ոչ միայն ներքին, այլ նաև արտաքին քաղաքականությունը: Ճիշտ եզրակացություններ անելու և իրավիճակը շտկելու փոխարեն, իշխանություններն Արևմուտքի հետ դիմակայության ուղղություն են վերցրել», - ասել է նա' հավելելով, որ եթե Բելառուսի Նախագահ Ալեքսանդր Լուկաշենկոն կարող է ազատ արձակելով 6 քաղբանտարկյալների' միանգամից փակել քաղբանտարկյալների թեման իր երկրում, ապա Ադրբեջանն իր 100 քաղբանտարկյալներով չի կարող լավ հարաբերություններ ունենալ համաշխարհային ժողովրդավարական հանրակցության հետ:

«Նման իրավիճակն անխուսափելիորեն պետք է բերեր միջազգային հանրակցության կողմից ճնշման: Իշխանությունների ներկայիս քաղաքականությունը բերելու է միջազգային հանրության հետ հարաբերությունների էլ ավելի վատացմանը»,- համոզմունք է հայտել մուսավաթական առաջնորդը:

Անդրադառնալով ԵԱՀԿ ժողովրդավարական հետազոտությունների մարդու իրավունքների գրասենյակի' Ադրբեջանում նոյեմբերի 1-ին անցկացվելիք խորհրդարանական ընտրությունների դիտորդությունից հրաժարվելու հնարավոր ազդեցություններին, Հաջիլըն ասել է, որ մինչ օրս Ադրբեջանում անցկացված բոլոր ընտրություններն օրինական չեն եղել, այդ թվում' 2013 թվականին անցկացված նախագահական ընտրությունները և դրանց հաջորդած քաղաքապետական ընտրությունները:

Նա անհիմն է անվանել ԵԱՀԿ-ից 380 դիտորդներ ընդունելուց իշխանությունների հրաժարումն' այն դեպքում, երբ Բաքուն ֆինանսավորել էր Եվրոխաղերին մասնակցած հազարավոր մարզիկների, պատվիրակությունների և հյուրերի ծախսերը:

«Միամիտ կլիներ սպասել, որ իշխանությունները կգնային ազատ և արդար ընտրությունների: Երկրում ժողովրդավարական նախընտրական իրադրություն և համապատասխան օրենսդրական բազա չկա, չկան իրավահավասար մրցակցության պայմաններ: Բոլոր ընտրահանձնաժողովները գտնվում են իշխանության վերահսկողության տակ»,- նշել է նա:

Հաջիլըն հավելել է, որ Ադրբեջանում անդուր իրավիճակ է ստեղծվում, և, բոլոր նախանշաններով, այն պետք է վատանա. տնտեսական ճգնաժամի գագաթակետը դեռ առջևում է, նավթը կշարունակի էժանանալ, մանաթը կշարունակի արժեզրկվել:

Ըստ Հաջիլըի' այդ ֆոնին Եվրամիության հետ դիմակայությունը քաղաքական ճգնաժամ էլ է նախագուշակում, ինչին հանրությունը չպետք է անմասն մնա:

Դրա հետ միասին, Հաջիլըն չի բացառել, որ «Մուսավաթ»-ը կարող է հրաժարվել խորհրդարանական ընտրություններից: «Դա կախված կլինի այն բանից, թե ինչպիսի քաղաքական իրավիճակ կստեղծվի ընտրությունների բոլոր փուլերում»,- ամփոփել է Ադրբեջանի գլխավոր մուսավաթականը: