Հովիկ Աբրահամյանը հորդորեց լրագրողներին իր առաջարկի մեջ վատ բան չփնտրել

ՀՀ վարչապետ Հովիկ Աբրահամյանն անդրադարձել է իր այն առաջարկին, որով Եվրասիական տնտեսական միության (ԵՏՄ) անդամ երկրներում ռազմավարական ապրանքների առևտրի դեպքում առաջարկել էր հրաժարվել դոլարից և անցում կատարել ռուբլիով հաշվարկին։

ԼՈւՐԵՐ.com-ի թղթակցի տեղեկացմամբ՝ այսօր Ազգային ժողովում կառավարության հետ հարցուպատասխանից առաջ Հովիկ Աբրահամյանը լրագրողների հետ զրույցում մեկնաբանեց իր առաջարկը: «Իմ առաջարկն էներգակիրներին է վերաբերել, որպեսզի մենք գազը գնենք ռուսական ռուբլով: Մենք արդեն պայմանավորվել ենք, որ Եվրասիական տնտեսական միության անդամ երկրները կքննարկեն այդ հարցը: Այն այդքան արագ լուծելի չէ, սակայն կարևորն այն է, որ մենք արդեն այդ հարցն ընդգրկել ենք օրակարգում»,- ընդգծեց վարչապետը:

Վարչապետի խոսքով՝ փոխարժեքի տատանումները որոշակի խնդիրներ են առաջացնում. «Իմ կարծիքով մենք շատ լավ առաջարկ ենք արել, դուք որևէ վատ բան մի փնտրեք, ուղղակի ուզում ենք մենք մեր խնդիրներին լուծում տանք, որը նաև իր տնտեսական ազդեցությունը կունենա»,- ասաց վարչապետը:

Նկատեց նաև, որ գազի դիմաց ՌԴ-ին ռուբլով վճարելը Հայաստանի տնտեսության համար ձեռնտու կլինի: