Ադրբեջանցի օլիգարխը համագործակցում է ԻՊ-ի հետ. միջազգային ԶԼՄ-ներ

Համաշխարհային մամուլը հաճախ է անդրադարձել Իրաքում և Սիրիայում ահաբեկչական խմբավորումերի, այդ թվում' «Իսլամական պետություն» խմբավորման վերահսկողության տակ գտնվող տարածքներից խողովակաշարերով նավթի' Թուրքիա հասնելու և վերվաճառվելու մասին:

Ինչպես հաղորդում է «Արմենպրես»-ը, մասնավորապես' ռուսաստանյան «Նովայա գազետա» հրատարակչության աղբյուրները հաստատել են ահաբեկիչների կողմից վերահսկվող խողովակաշարերով թուրքական «Ջեյհան» նավահանգիստ բեռնանավերով խոշոր ծավալներով նավթ փոխադրվելու մասին լուրերը: Թերթը հայտնել է այն բեռնանավերի մասին, որոնք ենթադրաբար վարձակալվել են թուրք-ադրբեջանցի միլիարդատեր օլիգարխ Մուբարիզ Մանսիմովին պատկանող Palmali Shipping & Agency JSC ընկերության կողմից: Ըստ հրատարակչության' աշխարհի առաջատար հատուկ ծառայությունները տիրապետում են այդ տեղեկատվությանը:

Ըստ թերթի' դեռևս 2014 թվականի սեպտեմբերին Եվրոպական խորհրդարանի արտաքին հարցերով հանձնաժողովի հաշվետվության ժամանակ Իրաքում Եվրամիության դեսպան Յանա Խիբասկովան հայտարարել էր, որ «ԵՄ որոշ երկրներ ԻՊ-ի մարտիկներից նավթ են գնում»: ՄԱԿ-ի Անվտանգության խորհուրդը հուլիսի 29-ին հանդես էր եկել Սիրիայում և Իրաքում գործող ահաբեկչական կազմակերպությունների կողմից նավթի առևտրի անթույլատրելիության մասին հայտարարությամբ:

Ավելի վաղ գերմանական DWN-ը և իսպանական La Republica-ն տեղեկություններ էին հրապարակել այն մասին, որ իրաքան Քուրդիստանի կառավարությունը և թուրքական հատուկ ծառայությունները լավ տեղեկացված են ԻՊ-ի կողմից վերահսկվող տարածքներից մաքսանենգ նավթի մատակարարումների մասին:

«Նովայա գազետա»-ն գրել է, որ Նյու Յորքում ԱՄՆ-ի և Ռուսաստանի Դաշնության նախագահներ Բարաք Օբամայի և Վլադիմիր Պուտինի առաջիկա հանդիպման ժամանակ բարձրացվելու է ԻՊ-ի ֆինանսավորման ուղիների փակման մասին հարցը: