ՍԱՊԾ-ում մսամթերք արտահանող տնտեսավարողների հետ քննարկվել են արտահանմանն առնչվող հարցեր

ՀՀ ԳՆ սննդամթերքի անվտանգության պետական ծառայության պետ Արմեն Հայրապետյանը սեպտեմբերի 29-ին հանդիպել է Եվրասիական տնտեսական միության անդամ մի պետությունից Եվրասիական տնտեսական միության անդամ մյուս պետություն փոխադրվող՝ հսկման ենթակա ապրանքների արտադրություն, վերամշակում և (կամ) պահպանում իրականացնող կազմակերպությունների և անձանց ՀՀ ռեեստրում (այսուհետ՝ ԵԱՏՄ ռեեստրում) գրանցված մսամթերք արտադրող տնտեսավարողների հետ՝ քննարկելու ընկերությունների արտադրած մսամթերքը ՌԴ շուկա արտահանելու նոր հնարավորությունը և գործընթացը ճիշտ կազմակերպելու և արտահանումն անխափան իրականացնելու համար պարզաբանումներ տալու նպատակով:

Արմեն Հայրապետյանը տնտեսավարողներին աջակցելու պատրաստակամություն է հայտնել՝ ընդգծելով, որ մսամթերքի արտահանման սահուն ընթացքն ապահովելու համար մինչև սահմանին հասնելն է պետք համագործակցել Ծառայության մասնագետների հետ, անհրաժեշտ տեղեկատվություն և խորհրդատվություն ստանալ փաստաթղթերի ձևակերման, սերտիֆիկացման գործընթացի և այլ հարցերի վերաբերյալ: Այս նպատակով Ծառայությունում կգործի մասնագիտական խումբ՝ տնտեսավարողներին օգնելու և հարցերին արագ արձագանքելու համար: Քննարկման ընթացքում կարևորվել է արտադրանքի անվտանգության ու որակի հարցը՝ որպես կարևոր նախապայման, ինչպես նաև առաջարկվել է ակտիվացնել աշխատանքները Հայաստանի մսամթերք արտադրողների միության շրջանակներում և, միավորելով ջանքերը, լավագույնս ներկայացնել հայկական ապրանքանիշը ռուսական շուկայում:

Տնտեսավարողները ողջունել են արտահանվող մսամթերքի ցանկը ընդլայնելու ուղղությամբ վերջին տարում Ծառայության գործադրած ջանքերը, որի արդյունքում հնարավոր է դարձել ավելի շատ արտադրատեսակներ իրացնել ռուսական շուկայում: Հանդիպման ընթացքում Ծառայության ներկայացուցիչները պատասխանել են տնտեսավարողներին հուզող բոլոր հարցերին, հստակեցլ են արտահանման ենթակա ապրանքատեսակների ցանկը: