ՀԱԷԿ-ի վերանորոգման ծրագրի բաշխումը երկու տարվա միջև թույլ կտա պահպանել էլէներգիայի սակագինը ընթացիկ մակարդակում

«ԴԵԼՈՅԹ ԸՆԴ ՏՈՒՇ» միջազգային խորհրդատվական ընկերությունը Հայաստանի էներգետիկայի բնագավառում կարգավորման խորհրդատվական ծառայության 1-ին փուլի հաշվետվության մեջ եզրակացրել է, որ ՀԱԷԿ-ի վերանորոգման ծրագրի բաշխումը երկու սակագնային տարիների միջև, «Հրազդան -5»-ի նոր բլոկի բեռնավորման հետ մեկտեղ, թույլ կտա պահպանել էլեկտրաէներգիայի վերջնական սակագինը ընթացիկ մակարդակում: «Արմենպրես»-ի հաղորդմամբ' հաշվետվության մեջ նշվում է, որ ներկայացված պայմանական հաշվարկը հաշվի չի առնում հնարավոր այլ ռիսկերը, որոնք ի վիճակի են ազդել սակագնի դինամիկայի վրա թե՛ աճման և թե՛ նվազման ուղղությամբ:

Սակագնի աճի փոփոխական գործոնների շրջանակը խորհրդատվական ընկերության կողմից սահմանափակվել է հետևյալ ենթադրություններով' Հայաստանում էներգիայի սպառման դինամիկան ընդունվում է 2015-2016թթ. սակագնային ժամանակահատվածի մակարդակի, այն է՝ 5,6 մլրդ կՎտժ: Բացի դրանից, չստացված մարժայի փոխհատուցումը և արագացված մաշվածությունը չեն ներառվում սակագնի հաշվարկում: Որոտանի ՀԷԿՀ վաճառքի վերաբերյալ պայմանագրի համաձայն՝ 2016թ. փետրվարից էլեկտրաէներգիայի արտադրության սակագինը կաճի 1,5 անգամ (9,13-ից հասնելով 13,37 դրամ/կՎտժ), մնացած ՀԷԿ-երի մասով սակագները կմնան անփոփոխ: Ընդ որում, բոլոր ՀԷԿ-երի մասով ջրառատության մակարդակը կպահպանվի:

ՋԷԿ-երի համար գազի գինը կպահպանվի նախորդ տարվա մակարդակին (230,8 ԱՄՆ դոլար/հազար խմ), իսկ նրանց տարեկան փոփոխությունը կորոշվի միայն ԱՄՆ դոլարի նկատմամբ դրամի փոխարժեքի դինամիկայով (Հայաստանի և ԱՄՆ սպառողական գների ինդեքսի համամասնության համաձայն. տվյալները՝ Global Insight):

Արտադրողների այլ ծախսերը և ՀԷՑ-ի ուղիղ ծախսերը, ինչպես և բարձրավոլտ ցանցերում կորուստների չափը, կմնան 2015-2016թթ. հաստատված սակագնային հայտի մակարդակում: Փոքր արտադրողների (փոքր ՀԷԿ-եր, հողմակայաններ, կենսազանգվածով արտադրող կայաններ) գծով սակագնի ինդեքսավորումն ընդունվում է վերականգնվող էներգառեսուրսներով աշխատող կայանների համար գործող մեթոդաբանության համաձայն. սակագնի 35%-ն ինդեքսավորվում է ըստ սղաճի, իսկ 65%-ը դրամ/ԱՄՆ դոլար փոխարժեքի փոփոխությունների տեսանկյունից: ՀԱԷԿ-ը կանգնեցվում է նորոգման 2017թ. և 2018թ. երեքական ամսով (մարտից մայիս): Դրա արդյունքում ՀԱԷԿ-ի արտադրությունը 2017-2018թթ. նվազում է 0,6 մլրդ կՎտժ-ով՝ գործող սակագնային ժամանակահատվածի համեմատ: Այդ ժամանակահատվածներում կայանը չի ստանալու հզորության վճարներ:

ՀԱԷԿ-ը նորոգման աշխատանքների իրականացման համար ներգրավում է 270 մլն ԱՄՆ դոլարի վարկային միջոցներ 15 տարի ժամկետով՝ 3% տարեկան տոկոսադրույքով: Ընդ որում, սակագնում ներառվում են միայն տոկոսավճարները:

ԲԷՑ սակագնում ներառվում է մինչև 2023թ. 108 մլն եվրո գումարով վարկի մայր գումարի մարումը: 2016-2017թթ. նախատեսված վճարումը կկազմի 4,1 մլրդ դրամ:

ՀԱԷԿ-ի բլոկի նորոգման համար կանգնեցման արդյունքում պակաս ստացված էներգիայի փոխհատուցումը նախատեսվում է 2016-2017թթ.«Հրազդան - 5»-ի հզորությունների բեռնավորումը մեծացնելու հաշվին (մինչև 1,1 մլրդ կվտժ՝ հաշվի առնելով արտահանումը):

ՀԱԷԿ-ից և «Հրազդան - 5»-ից բացի մնացած բոլոր կայանների արտադրական ծավալներն ըստ ամիսների մնում են նույնը, ինչ որ 2015-2016թթ. սակագնային ժամանակահատվածում: