Արաբական ԶԼՄ-ները հաղորդել են Սիրիայում Ռուսաստանի նոր ավիահարվածների մասին

Ստացվող հաղորդագրությունների համաձայն՝ Ռուսաստանը նոր ավիահարվածներ է հասցրել Սիրիայում: Ինչպես տեղեկացնում է «Արմենպրես»-ը, հղում անելով Լիբանանի հեռուստատեսությանը, գրոհի թիրախներ են դարձել ապստամբների դիրքերը Սիրիայի հյուսիս-արևմուտքում, որը վերահսկվում է որպես «Նվաճման բանակ» հայտնի միության կողմից:

Սեպտեմբերի 30-ին Ռուսաստանը հայտնել է «Իսլամական պետություն» ծայրահեղական խմբավորման դեմ քսան օդային գրոհներ կատարելու մասին:

ԱՄՆ-ում զգուշանում են, որ Ռուսաստանի թիրախներ են դարձել Սիրիայի նախագահ Բաշար Ասադի՝ ԻՊ-ի հետ չկապված հակառակորդները:

ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանի իշխանություններն ունեն ծայրահեղական այն կազմակերպությունների ցուցակը, որոնց դիրքերին ավիահարվածներ են հասցվելու:

Ռուսաստանի պաշտպանության նախարարությունում ավելի վաղ ընդգծել են, որ Սիրիայում ավիահարվածները հասցվում են բացառապես «Իսլամական պետության» զինյալների դիրքերին:

Մինչեռ ՄԱԿ-ում Սաուդյան Արաբիայի մշտական ներկայացուցիչ Աբդալա ալ Մուալիմին Ռուսաստանից պահանջել է անհապաղ դադարեցնել ռմբակոծումները Սիրիայում և թույլ չտալ դրանց կրկնվելը՝ հավելելով, որ ոչ մի երկիր չպետք է պայքար մղի «Իսլամական պետություն» խմբավորման դեմ՝ «միաժամանակ պաշտպանելով սիրիական ռեժիմի ահաբեկչությունը»:

Սաուդյան Արաբիան աջակցում է սուննիների չափավոր ընդդիմությանը, որը ձգտում է հասնել Սիրիայի նախագահ Բաշար Ասադի պաշտոնաթողությանը: էր Ռիադը խորը անհանգստություն է հայտնել Ռուսաստանի օդուժի կողմից հարվածներ հասցնելու կապակցությամբ:

Ինչպես նշում է BBC-ն, ռուս զինվորականները մոտ ժամանակներս ամերիկացի գործընկերների հետ կոնսուլտացիաներ են սկսելու Սիրիայում «չկանխամտածված միջադեպերից» խուսափելու համար: