Մալայզիական «Բոինգը» խոցվել է ռուսական БУК տեսակի զենիթային հրթիռային համակարգից. արևմտյան լրատվամիջոցներ

Համաշխարհային Մամուլ 14 Հոկտեմբեր, 2015 10:39

Նախօրեին համաշխարհային լրատվամիջոցների գլխավոր թեման 2014 թվականի հուլիսի 17-ին Ուկրաինայի արևելքում կործանված, «Մալայզիական ավիաուղիներին» պատկանող «Բոինգ 777» ինքնաթիռի կործանման միջազգային հետաքննության արդյունքների վերաբերյալ Նիդերլանդների անվտանգության խորհրդի կողմից հրապարակված զեկույցն էր:

Ըստ այդմ՝ հաղորդվում է, որ մարդատար ինքնաթիռը խոցվել է ռուսական БУК տեսակի զենիթային հրթիռային համակարգից: Մանրամասնվում է, որ 9M35 տիպի հրթիռը հարվածել է ինքնաթիռի առջևի ձախ մասին: Միևնույն ժամանակ, Նիդերլանդների անվտանգության խորհրդի զեկույցում ասվում է, որ հրթիռի արձակման ստույգ վայրը ճշտելու համար անհրաժեշտ է իրականացնել լրացուցիչ հետաքննություն, սակայն Reuters գործակալությունը գրում է, որ նիդերլանդական կողմին հայտնի են նույնիսկ քաղաքացիական ինքնաթիռի խոցման հետ առնչություն ունեցող անձանց անուններ:

Հիշեցնենք, որ «Մալայզիական ավիաուղիների» MH17 չվերթով Ամստերդամից Կուալա Լումպուր ուղևորվող ինքնաթիռը խոցվել էր Ուկրաինայի՝ անջատողականների վերահսկողության տակ գտնվող Դոնեցկի մարզի արեւելյան մասում: Ինքնաթիռում գտնվող բոլոր ուղևորները և անձնակազմը, ընդհանուր՝ 283 հոգի, զոհվել էին: Ողբերգության համար Ուկրաինայի իշխանությունները և արևմտյան երկրները մեղադրեցին Դոնբասի անջատականներին, իսկ վերջիններս՝ Կիևին: Միջադեպի հանգամանքները պարզելու համար ձևավորվել էր միջազգային հանձնաժողով՝ Նիդերլանդների անվտանգության խորհրդի գլխավորությամբ: