Պուտինը կարող է վերջ դնել միգրացիոն ճգնաժամին. The Washington Times

Ռուսաստանի նախագահ Վլադիմիր Պուտինը կարող է պատմության մեջ մուտք գործել որպես մի մարդ, ով վերջ է դրել սիրիացիների զանգվածային գաղթին, գրում է The Washington Times պարբերականը:

Հոդվածի հեղինակը կարծում է, որ որոշելով սկսել ռազմական արշավ Սիրիայում, Պուտինը վճռականություն է ցուցաբերել` ի տարբերություն ԱՄՆ-ի նախագահ Բարաք Օբամայի, ով Մերձավոր Արևելքում անգործություն է ցուցաբերել:

Երբ Սիրիայից փախստականները փորձել են Եվրոպա տեղափոխվել` Ռուսաստանը արևմտյան երկրներից մի կողմ է քաշվել` դիտավորյալ հրաժարվելով միանալ միջազգային ծրագրերին, որոնք ուղղված են փախստականներին օգնելուն: Պուտինը մեղադրել է Արևմուտքին տարածաշրջանում անկարգություններ հրահրելու մեջ, և հայտարարել, որ միգրացիոն ճգնաժամը լիովին կանխատեսելի էր:

Չնայած այն հանգամանքին, որ Ռուսաստանի և Սիրիայի միջև հեռավորությունը մոտ 1,5 հազար կմ է, Կրեմլը ընդունել է «միայն մի բուռ փախստականների», ընդգծում է պարբերականի սյունակագիրը: Ըստ նրա, երկու չեչենական պատերազմներից հետո Ռուսաստանը վախենում է այլ երկրներից մուսուլմանների ընդունել:

Հոդվածի հեղինակը նշում է, որ Վլադիմիր Պուտինը որոշակի սառնարյունությամբ է նայում սիրիացի փախստականների խնդրին, սակայն, մեր ժամանակներում հենց նա կարող է լինել այն մարդը, ով առաջնորդվելով սառը հաշվարկով ու ազգային շահերով` վերջ կդնի Սիրիայում արյունահեղությանը: