Քիմ Քարդաշյանի ֆենոմենը. Lady.mail.ru-ի անդրադարձը

Ամերիկահայ հեռուստաստղ Քիմ Քարդաշյանը տոնում է ծննդյան տարեդարձը: Հոկտեմբերի 21-ին իրապատում շոուի աստղը դարձավ 35 տարեկան: «Արմենպրես»-ի փոխանցմամբ' Քիմ Քարդաշյանի ծննդյան օրվա առթիվ նրա ֆենոմենը փորձել է բացահայտել ռուսական lady.mail.ru կայքը:

lady.mail.ru-ն հոդվածի սկզբում փորձում է հարցեր բարձրացնել, թե ով է Քիմ Քարդաշյանը և ինչ է նա արել, որ ամբողջ աշխարհը խոսում է նրա մասին: Այնուհետև կայքը նշում է, որ Քիմը ոչ աղմկոտ կինոդերեր և ոչ պլատինե ալբոմներ ունի, սակայն հեղինակավոր հրատարակությունների շապիկներին է հայտնվում ավելի հաճախ, քան Անջելինա Ջոլին: lady.mail.ru-ն հոդվածով փորձում է բացահայտել, թե ինչ է պետք անել հասնելու այն ամենին, ինչ ունի Քիմը:

Կայքը նշում է, որ կարևոր է ծնվել ճիշտ ընտանիքում, և հավելում, որ Քարդաշյանը մշտապես շրջապատված է եղել շքեղությամբ ու հարստությամբ: Այն, որ Քիմը երբեք չի իմացել, թե ինչ է աղքատությունը, որոշ չափով կանխորոշել է նրա ճակատագիրը:

lady.mail.ru-ն Քիմի հաջողության գաղտնիքներից մեկը համարում է այն, որ նա պատրաստ է եղել իր կյանքը վերածել շոուի և միշտ սիրել է իրապատում շոուները: Բացի այդ, կայքը նշում է այն փաստը, որ Քիմն ամուսնացել է PR-ի համար, հետո էլ իր հղիությունն է վերածել շոուի:

Կայքը զարմանք է արտահայտում, թե ինչպես է Քիմ Քարդաշյանի սելֆիների գիրքը մեծ պահանջարկ վայելել: Այն նաև շեշտում է, որ աստղը նույնիսկ իր սեփական ձախողումների վրա գումար է վաստակում, ինչպես նաև հաճախ տարօրինակ հայտարարություններով հանդես գալիս:

Հոդվածագիրը Քիմին համարում է մեծ գործարար, քանի որ նա օդից գումար է վաստակում, ստեղծում օծանելիք, բջջային խաղեր, հրապարակում DVD-ներ սեփական մարզումներով, գովազդում արտադրանք: Վերջերս Քիմը բացել է սեփական կայքը, որում կիսվում է հաջողության գաղտնիքներով. ի դեպ, կայքի պարունակությունը դիտելու համար անհրաժեշտ է վճարել: Վերջում կայքն անդրադառնում է նաև ամերիկահայ աստղի մարմնի բարեմասնություններին:

Ամերիկահայ հայտնի Քարդաշյանների ընտանիքն այս տարի ապրիլի 8-ին ժամանեց Երևան: Նրանց հետ Հայաստան է եկել նաև Քիմ Քարդաշյանի ամուսինը՝ ռեփեր Քանյե Ուեսթը: Քիմ և Քլոե Քարդաշյաններն շրջել են մայրաքաղաքով, այցելել «Մայր Հայաստան» հուշարձան և «Կասկադ» համալիր' ընթացքում լուսանկարվելով և շփվելով հայ երկրպագուների հետ, եղել Գեղարդում: Հայաստանում Քարդաշյանները ծանոթացել են իրենց պատմական հայրենիքի պատմամշակութային վայրերին: Քարդաշյանների այցը մեծ ուշադրության էր արժանացել նաև համաշխարհային մամուլում. տարբեր պարբերականներ և թերթեր այցի շնորհիվ անդրադառնում էին նաև Հայոց ցեղասպանությանը: