Հայաստանում առևտրի շրջանառության ծավալը նվազել է 5.6 տոկոսով

Այս տարվա հունվար-սեպտեմբերին նախորդ տարվա նույն ժամանակահատվածի համեմատ Հայաստանում առևտրի շրջանառության ծավալն, ընթացիկ գներով, կազմել է 1 տրլն 620 մլրդ 631.9 մլն դրամ (ավելի քան 3 մլրդ 431.5 մլն ԱՄՆ դոլար)' նախորդ տարվա նույն ժամանակահատվածի համեմատ նվազելով 5.6 տոկոսով:

Ինչպես ԼՈՒՐԵՐ.com-ը տեղեկացավ ՀՀ Ազգային վիճակագրական ծառայությունից, մանրածախ առևտրի ոլորտում գրանցվել է 7.6 տոկոս նվազում' մինչև 946 մլրդ 113.5 մլն դրամ, մեծածախ առևտրի ոլորտում արձանագրվել է 1.9 տոկոս անկում' կազմելով 618 մլրդ 26.6 մլն դրամ, իսկ ավոտոմեքենաների առևտրի ծավալը (ներառում է ինչպես մասնագիտացված առևտրի կետերի միջոցով իրականացված ավտոմեքենաների, դրանց մասերի և պարագաների վաճառքը, այնպես էլ' դրանց տեխնիկական սպասարկումը և նորոգումը) նախորդ տարվա առաջին ինն ամիսների համեմատ նվազել է 8.6 տոկոսով և կազ մել 56 մլրդ 491.8 մլն դրամ:

Մանրածախ առևտրի ոլորտում աճ է գրանցվել սպառողական ապրանքների և գյուղատնտեսական արտադրանքի շուկաների պարագայում' համապատասխանաբար, 3.4 տոկոս և 4.8 տոկոս, որտեղ առևտրի ծավալները կազմել են, համապատասխանաբար, 56 մլրդ 369.7 մլն դրամ և 14 մլրդ 436 մլն դրամ: Խանութների առևտրի ծավալը նախորդ տարվա հունվար-սեպտեմբերի համեմատ նվազել է 10.7 տոկոսով' մինչև 670 մլրդ 543 մլն դրամ, կրպակներինը' 9.1 տոկոսով' մինչև 21 մլրդ 902.5 մլն դրամ, իսկ առևտրի այլ օբյեկտներինն աճել է 0.5 տոկոսով' մինչև 182 մլրդ 862.3 մլն դրամ:

Այս տարվա հոկտեմբերի 1-ի դրությամբ' ապրանքային պաշարները մանրածախ առևտրում կազմել են 155 մլրդ 757.1 մլն դրամ, իսկ ապրանքային պաշարներով ապահովվածությունը' 59 օր' սեպտեմբերի 1-ի 146 մլրդ 423.6 մլն դրամի և 54 օրվա փոխարեն: