«Կոմերսանտի» աղբյուրը հնարավոր է համարել պայթյունի վարկածն A321 ինքնաթիռում

Ռուսաստանի «Կոգալիմավիա» ընկերության Airbus A321 մարդատար ինքնաթիռի վթարը կարող էր տեղի ունենալ ռումբի պայթյունի հետևանքով: Ինչպես տեղեկացնում է «Արմենպրես»-ը, այս վարկածն առաջադրել է «Կոմերսանտ» թերթի հարցմանը մասնակցած մասնագետներից մեկը:

«Փորձագետները համոզված են, որ Ռուսաստանի արդի պատմության մեջ խոշորագույն ավիաաղետը տեղի է ունեցել սալոնի պայթումային ապահերմետիկացման պատճառով. հանրանավի հենամարմինը պայթել է մեծ բարձրության վրա ճնշման կտրուկ անկումից»,- գրել է հրատարակությունը: Ֆյուզելյաժի ամբողջականությունը խախտել կարող էր, օրինակ, ոչ մեծ ռումբի հարվածային ալիքը:

Ինչպես կարծում է զրուցակիցը, լոկալ պայթյունը չպետք է կործաներ Ռուսաստանի ավիաընկերության ինքնաթիռը, բայց կարող էր սալոնի ապահերմետիկացման պատճառ դառնալ ճնշման կտրուկ անկման հետևանքով:

Նոյեմբերի 1-ին Ռոսավիացիայի ղեկավար Ալեքսանդր Ներադկոն հավաստել է, որ ռուսական ինքնաթիռի կործանումը տեղի է ունեցել մեծ բարձրության վրա: Ռուսաստանի ավիացիոն և տրանսպորտային կառույցներում ՏԱՍՍ-ի աղբյուրները հաղորդել են, որ «հանրանավի կործանման գոտում ռուս փորձագետների կողմից գտնված թևի տարրի ջերմային և ֆիզիկական վնասումը վկայում է, որ ինքնաթիռը կարող էր կրակով բռնկվել օդում»:

Հոկտեմբերի 31-ին Reuters գործակալությունը հաղորդել է, որ «Իսլամական պետության» կողմից վերահսկվող ահաբեկչական խմբավորումներից մեկն ստանձնել է պատասխանատվությունը Եգիպտոսում ռուսական հանրանավի աղետի համար: Իր հերթին Ռուսաստանի տրանսպորտի նախարար Մաքսիմ Սոկոլովն անհավաստի է համարել այդ տեղեկատվությունը: